- చిన్న చిన్నషాపులు కట్టి అద్దెకు ఇచ్చే యోచన
- ట్రాఫిక్ సమస్య పరిష్కారం.. ఆదాయం వచ్చే చాన్స్
హైదరాబాద్సిటీ,వెలుగు : నగరంలో చౌరస్తాలు, రోడ్ల సమీపంలో ఉన్న చిన్న చిన్న ప్రభుత్వ స్థలాలను రక్షించడంతో పాటు వాటి ద్వారా ప్రభుత్వానికి ఆదాయం సమకూర్చేందుకు హెచ్ఎండీఏలోని హుమ్టా కొత్త ప్లాన్ రూపొందించింది. జీహెచ్ఎంసీ, ఎంఎంసీ, సీఎంసీ పరిధిలోని చౌరస్తాలు, రోడ్ల సమీపంలో ప్రభుత్వానికి చిన్న చిన్న స్థలాలు చాలా ఉన్నాయి.
వీటిని కొందరు ప్రైవేట్వ్యక్తులు పాగా వేసి కబ్జా చేస్తుండడంతో ఆయా స్థలాల్లో చిన్నచిన్న షాపులు కట్టి అద్దెకు ఇవ్వాలని భావిస్తోంది. ‘వెండర్ జోన్’ పేరుతో వీటిని అభివృద్ధి చేసి కబ్జాల నుంచి రక్షించడంతో పాటు ఇన్కం సంపాదించాలని
అనుకుంటోంది.
వెండర్ జోన్లు ఇలా...
సిటీలోని చాలా ప్రాంతాల్లో చిరు వ్యాపారులు ఫుట్పాత్లపై, ఖాళీగా ఉన్న ప్రభుత్వ స్థలాల్లో వ్యాపారాలు నిర్వహించుకుంటున్నారు. వీరి వల్ల ఆయా ప్రాంతాల్లో ట్రాఫిక్ ఇబ్బందులు తలెత్తుతున్నాయి. ప్రభుత్వానికి చెందిన స్థలాలను ఫ్రీగా వాడుకుంటుండడంతో ఈ ఖాళీ ప్రదేశాల్లో చిన్న చిన్నషాపులను కట్టి వెండర్స్ జోన్లు ఏర్పాటు చేయాలని నిర్ణయించారు. ఇందులో భాగంగా సిటీలో ఎక్కడెక్కడ ప్రభుత్వానికి చెందిన చిన్న చిన్న స్థలాలు ఉన్నాయన్న దానిపై నివేదిక సిద్ధం చేస్తున్నారు.
ముందుగా అమీర్పేట జంక్షన్, సత్యం థియేటర్ఎదురుగా ప్రభుత్వానికి చెందిన ఖాళీ స్థలాలను కొందరు చిరు వ్యాపారులు వాడుకుంటున్నారని గుర్తించారు. ఇక్కడి స్థలాల్లో వాహనాలు పార్కింగ్చేయడం, చిన్న చిన్న డబ్బాలు ఏర్పాటు చేయడం, తోపుడు బండ్ల వ్యాపారాలు చేస్తుండడంతో ట్రాఫిక్ సమస్య ఉత్పన్నమవుతుందని గుర్తించారు. దీంతో ఇక్కడ వెండర్ జోన్ ఏర్పాటు చేయాలని నిర్ణయించారు. షాపులు కట్టి చిరు వ్యాపారులకే అద్దెకు ఇవ్వడం వల్ల ఆదాయమూ వస్తుందని చెప్తున్నారు.
