యాదాద్రిలో బీసీలకు తగ్గినయ్‌..గత ఎన్నికల్లో బీసీలకు ఐదు చైర్మన్ పోస్టులు

•     ఈ ఎన్నికల్లో ఒక్కటే
•     జనరల్​ మహిళకు ఒకటి నుంచి మూడుకు పెంపు

యాదాద్రి, వెలుగు: మున్సిపాలిటీ ఎన్నికల రిజర్వేషన్ల కేటాయింపు ప్రక్రియ ముగిసింది. గత ఎన్నికల కంటే ఈసారి చైర్మన్ల రిజర్వేషన్ల కేటాయింపులో బీసీలకు తగ్గిపోయాయి.  ఆ స్థానంలో జనరల్​మహిళలకు పెరిగాయి. 2011 జనాభా ప్రాతిపదికతో ఎస్సీ, ఎస్టీలకు గతేడాదిలో నిర్వహించిన సామాజిక, ఆర్థిక సర్వే ఆధారంగా డెడికేషన్​కమిషన్​ఇచ్చిన రిపోర్ట్​ ప్రకారం బీసీలకు రిజర్వేషన్ల ప్రక్రియను ఆఫీసర్లు నిర్వహించారు. దీంతో 2020 మున్సిపాలిటీ ఎన్నికల్లో కల్పించిన రిజర్వేషన్ల కంటే ఈసారి బీసీలకు తగ్గిపోయాయి. 

యాదాద్రిలో బీసీలకు తగ్గినయ్​ 

యాదాద్రి జిల్లాలోని ఆరు మున్సిపాలిటీల్లో 104 వార్డులు ఉన్నాయి. 2020 మున్సిపాలిటీ ఎన్నికల్లో జిల్లాలోని ఆరు మున్సిపాలిటీల్లో ఐదు చైర్మన్​ సీట్లు బీసీలకు, ఒకటి ఓసీ మహిళకు రిజర్వ్​అయ్యాయి. బీసీలకు సంబంధించిన రిజర్వేషన్లలో డ్రా తీయగా.. రెండు మున్సిపాలిటీలు మహిళలకు దక్కాయి.  దీంతో ఆరు మున్సిపాలిటీల్లో 3 చైర్మన్​ స్థానాలు మహిళలకు దక్కినట్టైంది. ఎస్సీ, ఎస్టీలు  కౌన్సిలర్​ స్థానాలతోనే సరిపెట్టుకున్నారు. త్వరలో జరగబోయే ఎన్నికలకు సంబంధించి రిజర్వేషన్​ ప్రక్రియ ముగిసింది. ఈ రిజర్వేషన్లలో బీసీలకు కోతపడింది. 

గత ఎన్నికల్లో బీసీలకు ఐదు చైర్మన్లు రిజర్వేషన్​అయితే.. ఇప్పుడు బీసీలకు ఒక్క చైర్మన్ మహిళకు రిజర్వ్​అయింది. మిగిలిన వాటిలో జనరల్, ఎస్సీ మహిళ, మూడు జనరల్​ మహిళలకు రిజర్వ్​అయ్యాయి. ఇక వార్డుల విషయానికొస్తే గతంలో బీసీలకు 33, ఎస్సీలకు14, ఎస్టీలకు 6, జనరల్​కు 53 అయ్యాయి. ఈ ఎన్నికల్లో బీసీలకు రెండు తగ్గి 31కి పరిమతమయ్యాయి.

ఎస్సీ మహిళకు ఫస్ట్​ టైమ్​

2020 ఎన్నికల కంటే ఈసారి మహిళలకు చైర్మన్​రిజర్వేషన్లలో వాటా పెరిగింది. గత ఎన్నికల్లో రెండు జనరల్​మహిళ, ఒకటి బీసీ మహిళకు రిజర్వ్​అయ్యాయి. జిల్లాలో ఈసారి ఎస్సీ మహిళకు మోత్కూరు రిజర్వ్​అయింది. బీసీ మహిళకు ఒకటి, మూడు మున్సిపాలిటీలలో జనరల్​ కోటాలో మహిళలకు రిజర్వ్​ అయ్యాయి.