ప్రగతి భవన్ ను సీజ్ చేయాలి: ఎన్వీఎస్ఎస్ ప్రభాకర్

• హైకోర్టు సీజేకు బీజేపీ రాష్ట్ర ఉపాధ్యక్షుడు ఎన్వీఎస్ఎస్ ప్రభాకర్

హైదరాబాద్, వెలుగు: అవినీతి, అక్రమాలకు పాల్పడేవారికి, పన్ను ఎగవేతదారులకు ప్రగతి భవన్ అడ్డాగా మారిందని, దానిని వెంటనే సీజ్ చేయాలని బీజేపీ రాష్ట్ర ఉపాధ్యక్షుడు ఎన్వీఎస్ఎస్ ప్రభాకర్ హైకోర్టు చీఫ్ జస్టిస్​ను కోరారు. సీబీఐ విచారణకు హజరయ్యేముందు, ఆ తర్వాత..  ఎమ్మెల్సీ కవిత ప్రగతి భవన్​కే వచ్చారని, తాజాగా ఎమ్మెల్యే రోహిత్ రెడ్డి కూడా ఈడీ నోటీసు అందుకున్న తర్వాత, విచారణకు హజరయ్యేముందు కూడా ప్రగతి భవన్​కే వచ్చారని ఆయన ఆరోపించారు. అందుకే ప్రగతి భవన్​ను సీజ్ చేసి సీఎం కేసీఆర్​ను న్యాయస్థానం ముందుకు పిలవాలని సూచించారు. 

ఈ మేరకు ఎన్వీఎస్ఎస్ బీజేపీ స్టేట్ ఆఫీసులో సోమవారం మీడియాతో మాట్లాడారు. ఈడీ నోటీసులు అందుకున్నోళ్లకు కౌంటర్ సలహాలు ఇచ్చేందుకు ప్రభుత్వం నియమించిన లాయర్లు, పోలీసులు ప్రగతి భవన్​లో సలహాలు ఇస్తున్నారని ఆరోపించారు. కేసీఆర్​కు వత్తాసు పలుకుతున్న ఆ లాయర్లు, పోలీసులపైనా చర్యలు తీసుకోవాలని డిమాండ్ చేశారు. అనైతిక చర్యలకు, రాజ్యాంగ వ్యతిరేక కార్యకలాపాలకు, అవినీతి.. అక్రమాలకు పాల్పడేవాళ్లకు ప్రగతి భవన్ అడ్డాగా మారిందని ఎన్వీఎస్ఎస్  ఆరోపించారు.

కాంగ్రెస్ పని ఖతం.. 

కాంగ్రెస్ లో కోవర్టులంటూ ఆ పార్టీ నేతలే ఒకరిపై మరొకరు విమర్శలు చేసుకుంటున్నారని, టీఆర్ఎస్ కు, సీఎం కేసీఆర్​కు అసలు కోవర్టు  కాంగ్రెస్ హైకమాండేనని ఎన్వీఎస్ఎస్ ఆరోపించారు. రాష్ట్రంలో కాంగ్రెస్ పని అయిపోయిందన్నారు. కాంగ్రెస్ ను బలహీనపరిచి, తాము బలపడాలని కోరుకోవట్లేదని అన్నారు. తెలంగాణ ప్రజల నమ్మకాన్ని గెలిచి రాష్ట్రంలో అధికారంలోకి వస్తామన్నారు.