మహారాష్ట్రలో శివసేనకు సగం సీట్లు ఇవ్వడం ఇబ్బందేనంటున్న నేతలు
ఈ ఏడాది చివర్లో జరగనున్న మహారాష్ట్ర అసెంబ్లీ ఎన్నికల్లో అధికార బీజేపీ సింగిల్గా పోటీచేయాలని భావిస్తున్నట్లు ఆ పార్టీ వర్గాలు తెలిపాయి. ఈమధ్య బీజేపీలోకి కొత్త నేతల చేరికలు, టికెట్లు ఆశించేవాళ్ల సంఖ్య పెరగడంతో మిత్రపక్షం శివసేనతో సీట్ల పంపకం ఇబ్బందికరంగా మారిందని నేతలు వెల్లడించారు. ఆశించినన్ని సీట్లు సేనకు దక్కకపోవచ్చంటూ సీఎం దేవేంద్ర ఫడ్నవీస్, రాష్ట్ర బీజేపీ చీఫ్ చంద్రకాంత్‌ పాటిల్ చేసిన కామెంట్లతో ఇప్పుడీ అంశం చర్చనీయాంశమైంది.
మహారాష్ట్రలో మొత్తం 288 అసెంబ్లీ స్థానాలుండగా, మిత్రపక్షాలకు 18 సీట్లను వదిలేసి, మిగతావాటిని బీజేపీ, సేన చెరిసగం పంచుకోవాలని మొదట నిర్ణయించారు. ఫిబ్రవరిలో బీజేపీ చీఫ్ అమిత్ షాతో శివసేన చీఫ్ ఉద్దవ్ థాక్రే మధ్య చర్చల తర్వాత ఈ మేరకు ప్రకటన కూడా వెలువడింది. ఆ లెక్కన రెండు పార్టీలూ చెరో 135 స్థానాల్లో పోటీకి దిగాల్సిఉంది. ప్రస్తుతం బీజేపీకి సొంతగా 122 మంది ఎమ్మెల్యేలుండగా, ఆరుగురు ఇండిపెండెంట్లు బేషరతుగా మద్దతిస్తున్నారు. ఈమధ్యే కాంగ్రెస్కు చెందిన నలుగురు ఎమ్మెల్యేలూ బీజేపీలో చేరారు.
‘‘సిట్టింగ్ ఎమ్మెల్యేలే బీజేపీ కి 132 మంది ఉన్నారు. అంటే ఇంకో ముగ్గురు కొత్తవాళ్లకు మాత్రమే చాన్స్ దొరుకుతుంది. ఇది కచ్చితంగా ఇబ్బందికర పరిణామమే. సీట్ల సర్దుబాటుపై కసరత్తు చేస్తున్నాం’’అని మహారాష్ట్ర బీజేపీ చీఫ్ పాటిల్ అన్నారు. సీఎం ఫడ్నవీస్ కూడా సేన సీట్లలో కోత ఉండొచ్చని హింట్ ఇస్తూనే.. పొత్తు మాత్రం తెంచుకోబోమని క్లారిటీ ఇచ్చారు. ‘‘ప్రస్తుతం బీజేపీకి 122, శివసేనకు 63 మంది సిట్టింగ్ ఎమ్మెల్యేలున్నారు కాబట్టి ఆ 185 సీట్లపై లొల్లి ఉండదు. మిత్రపక్షాలకు కేటాయించాలనుకున్న 18 సీట్లలోనూ తేడా రాకపోవచ్చు. ఇవిపోను మిగతా స్థానాల్ని చెరిసగం పంచుకోవాలా లేక ముందే అనుకున్నట్లు మొత్తం సీట్లలో చెరిసగం పోటీకి దిగాలా అనేదానిపై ఇంకా నిర్ణయం తీసుకోలేదు’’అని ఫడ్నవీస్ వివరించారు.
