ఇస్లామాబాద్: పాకిస్తాన్లో టెర్రరిస్టులు దాడులకు తెగబడ్డారు. పోలీసుల వాహనాన్ని లక్ష్యంగా చేసుకుని ఇంప్రూవైజ్డ్ ఎక్స్ ప్లోజివ్ డివైజ్ (ఐఈడీ)ని పేల్చడంతో ఏడుగురు చనిపోయారు. సోమవారం ఖైబర్ పఖ్తుంఖ్వా ప్రావిన్స్లో ఈ దారుణం జరిగింది. ఈ దాడికి సంబంధించిన వీడియోను ఉగ్రవాదులు బుధవారం రిలీజ్ చేశారు. రోజువారీ విధుల్లో భాగంగా సోమవారం ట్యాంక్ జిల్లాలో పోలీసులు పెట్రోలింగ్ నిర్వహిస్తున్నారు. ఈ వెహికల్ను లక్ష్యంగా చేసుకుని తెహ్రీక్–ఇ– తాలిబాన్ (టీటీపీ)కు అనుబంధంగా ఉన్న ప్రత్యేక విభాగం సభ్యులు రిమోట్ కంట్రోల్తో ఐఈడీని పేల్చారు.
దీంతో వెహికల్ తునాతునకలైంది. ఈ ఘటనలో ఏడుగురు ప్రాణాలు కోల్పోయారు. పేలుడు తర్వాత రోడ్డుపై పడి ఉన్న పోలీసులపై టీటీపీ సభ్యులు కాల్పులు కూడా జరిపారు. ఈ ఘటనపై పోలీసులు ఒక ప్రకటన రిలీజ్ చేశారు. ఐదుగురు అధికారులు స్పాట్లోనే మరణించగా, మరో ఇద్దరు ఆస్పత్రిలో చికిత్స పొందుతూ చనిపోయారని తెలిపారు. మృతుల్లో స్టేషన్ హౌజ్ ఆఫీసర్, సబ్ ఇన్ స్పెక్టర్, ఎలైట్ ఫోర్స్ సిబ్బంది, డ్రైవర్ ఉన్నారని చెప్పారు.
బలూచిస్తాన్ లో నలుగురు టెర్రరిస్టులు హతం
పాక్ బలగాలు జరిపిన ఆపరేషన్లో నలుగురు టెర్రరిస్టులు హతమయ్యారు. సోమవారం బలూచిస్తాన్ ప్రావిన్స్లో కలత్ జిల్లాలో ఈ ఘటన జరిగింది. ఈ మేరకు బుధవారం సైన్యం ఒక ప్రకటన రిలీజ్ చేసింది. ఇంటెలిజెన్స్ వర్గాలు అందించిన సమాచారంతో టెర్రరిస్టుల స్థావరాలపై భద్రతా దళాలు దాడి చేశాయి. ఈ క్రమంలో చోటు చేసుకున్న ఎదురు కాల్పుల్లో నలుగురు టెర్రరిస్టులు హతమయ్యారని సైన్యం తెలిపింది.
