హైదరాబాద్: ఆ ఇంట్లో మొన్ననే పెళ్లి జరిగింది. ఇంకా చుట్టాలు, బంధువులతో ఇళ్లంతా సందడిగా ఉంది. ఇంతలో అనుకోని దుర్ఘటనతో పెళ్లింట్లో విషాదం అలుముకుంది. మేనమామ పెళ్ళికి అమ్మమ్మ ఇంటికి వచ్చిన బాలుడు అపార్ట్మెంట్ నాలుగో అంతస్తు నుంచి పడి మృతి చెందాడు. ఈ విషాద ఘటన మంచిర్యాల జిల్లా కేంద్రం గౌతమి నగర్లోని అవినాష్ అపార్ట్మెంట్లో జరిగింది.
వివరాల ప్రకారం.. నిర్మల్ జిల్లా కేంద్రానికి చెందిన టీచర్ రాజశేఖర్ తన బావమరిది పెళ్లికి భార్యాపిల్లలతో కలిసి మంచిర్యాలలోని అత్తగారింటికి వచ్చాడు. ఇటీవలే పెళ్లి తంతు పూర్తి కాగా సోమవారం (నవంబర్ 3) ఒడిబియ్యం పోసుకోవడంతో కుటుంబ సభ్యులు, బంధువులు ఆ సందడిలో మునిగిపోయారు.
మరోవైపు రాజశేఖర్ కొడుకు సహర్ష్ (10) అపార్ట్మెంట్ నాలుగో అంతస్తుకు వెళ్లి ఆడుకుంటున్నాడు. ఈ క్రమంలో ప్రమాదవశాత్తు అక్కడ నుంచి కింద పడ్డాడు. తీవ్ర గాయాలైన సహర్ష్ అక్కడికక్కడే చనిపోయాడు. ఈ ఘటనతో పెళ్లి ఇంట్లో తీవ్ర విషాదం అలుముకుంది. సహర్ష్ తల్లిదండ్రులు, కుటుంబ సభ్యులు కన్నీరుమున్నీరుగా విలపించారు. బాలుడి తండ్రి ఫిర్యాదు మేరకు కేసు నమోదు చేసినట్టు ఎస్సై తిరుపతి తెలిపారు.
