రామచంద్రాపురం/జిన్నారం, వెలుగు: తమ్ముడు చనిపోయాడని తెలిసి గుండెపోటుతో అన్న కుప్పకూలిపోయాడు. ఈ ఘటన సంగారెడ్డి జిల్లా జిన్నారం మండలంలో చోటుచేసుకుంది. జిన్నారం మండలం మంగంపేట గ్రామానికి చెందిన చాకలి భూపాల్(38), చాకలి ముత్యాలు(48) అన్నదమ్ములు. భూపాల్సెంట్రింగ్పని చేస్తుండగా, ముత్యాలు పెయింటింగ్ చేసుకుంటూ జీవిస్తున్నారు. గురువారం సాయంత్రం భూపాల్ సోదరుడి వరుసయ్యే చాకలి శేఖర్ తో కలిసి జిన్నారం-–మంగంపేట మార్గంలో వస్తుండగా కారు ఢీకొట్టింది. ఇద్దరికి తీవ్రగాయాలయ్యాయి. ఆసుపత్రికి తరలిస్తుండగా భూపాల్ మృతిచెందాడు. తమ్ముడికి యాక్సిడెంట్ అయ్యిందని సమాచారం అందడంతో ముత్యాలు శుక్రవారం హాస్పిటల్కు వెళ్లాడు. అక్కడ తమ్ముడు చనిపోయాడని తెలియడంతో ఒక్కసారిగా కుప్పకూలిపోయాడు. డాక్టర్లు పరీక్షించి ముత్యాలు గుండెపోటుతో చనిపోయాడని నిర్ధారించారు. భూపాలుకు ఇద్దరు, ముత్యాలుకు ఇద్దరు పిల్లలు ఉన్నారు. పటాన్చెరు ఎమ్మెల్యే మహిపాల్ రెడ్డి అంత్యక్రియల నిమిత్తం రూ. 30 వేలు అందజేశారు. మృతుల కుటుంబాలను ఆదుకుంటామని హామీ ఇచ్చారు.
