ఇరాన్ యుద్ధం కారణంగా అంతర్జాతీయ ఇంధన సరఫరా వ్యవస్థ అతలాకుతలమవుతోంది. ముఖ్యంగా గల్ఫ్ దేశాల నుంచి గ్యాస్ సరఫరాకు తీవ్ర అంతరాయం కలగడంతో.. భారత్ తన ఇంధన అవసరాల కోసం రష్యా వైపు మొగ్గు చూపుతోంది. రష్యాకు చెందిన 'ఆర్కిటిక్ ఎల్ఎన్జీ 2' ప్రాజెక్టు నుండి LNG దిగుమతి చేసుకునేందుకు వీలుగా అమెరికా నుండి ప్రత్యేక మినహాయింపును కోరుతూ భారత ప్రభుత్వం చర్చలు జరుపుతోంది. రష్యా-ఉక్రెయిన్ యుద్ధం కారణంగా ఈ ప్రాజెక్టుపై అమెరికా ఆంక్షలు విధించిన సంగతి తెలిసిందే.
ప్రస్తుతం హోర్ముజ్ జలసంధి గుండా రవాణా నిలిచిపోవడంతో గల్ఫ్ దేశాల నుండి భారత్కు అందాల్సిన ఎల్ఎన్జీ సరఫరాలో తీవ్ర జాప్యం జరుగుతోంది. ఇది దేశీయంగా విద్యుత్ ఉత్పత్తి, ఎరువుల తయారీ పరిశ్రమలపై ప్రతికూల ప్రభావం చూపుతోంది. ఈ సంక్షోభాన్ని అధిగమించడానికి రష్యా నుండి తక్కువ ధరకు లభించే గ్యాస్ను దిగుమతి చేసుకోవడమే ఏకైక మార్గమని భారత్ భావిస్తోంది. ఇప్పటికే రష్యా నుండి ముడిచమురు దిగుమతుల్లో భారత్ అగ్రస్థానంలో ఉండగా, ఇప్పుడు గ్యాస్ విషయంలోనూ అదే వ్యూహాన్ని అనుసరిస్తోంది.
ALSO READ : యూఎస్ కరెన్సీపై ట్రంప్ సంతకం..
భారత్ తన వాదనను అమెరికా ముందు బలంగా ఉంచుతోంది. ప్రపంచ ఇంధన భద్రత.. భారత ఆర్థిక వ్యవస్థ స్థిరత్వం దృష్ట్యా ఈ మినహాయింపు అవసరమని దౌత్యపరమైన చర్చల్లో స్పష్టం చేస్తోంది. ఒకవేళ అమెరికా ఈ విజ్ఞప్తిని అంగీకరిస్తే, గల్ఫ్ దేశాలపై ఆధారపడటం తగ్గి, తక్కువ ధరకే గ్యాస్ లభ్యమవుతుంది. అయితే రష్యాపై ఆంక్షల విషయంలో కఠినంగా ఉన్న అమెరికా, భారత్ విజ్ఞప్తికి ఎలా స్పందిస్తుందనేది ఇప్పుడు అంతర్జాతీయ స్థాయిలో ఆసక్తికరంగా మారింది. ఈ నిర్ణయం భారత్-అమెరికా సంబంధాలతో పాటు గ్లోబల్ ఎనర్జీ మార్కెట్పై కూడా ప్రభావం చూపనుంది.
