హైదరాబాద్: ఎగ్జిట్ పోల్స్తో మాకు సంబంధం లేదని.. జూబ్లీహిల్స్ ఉప ఎన్నికలో బీఆర్ఎస్ గెలవబోతుందని ఆ పార్టీ అభ్యర్థి మాగంటి సునీత గోపినాథ్ ధీమా వ్యక్తం చేశారు. శుక్రవారం (నవంబర్ 14) జూబ్లీహిల్స్ బైపోల్ ఓట్ల లెక్కింపు జరగనున్న నేపథ్యంలో ఆమె కౌంటింగ్ కేంద్రానికి వెళ్లారు. ఈ సందర్భంగా సునీత మీడియాతో మాట్లాడుతూ.. జూబ్లీహిల్స్ ఉప ఎన్నికలో మేమే గెలవబోతున్నామని ధీమా వ్యక్తం చేశారు. కొందరు రిగ్గింగ్ చేసి గెలవాలని చూశారని ఆరోపించారు.
ఇదిలా ఉంటే.. కౌంటింగ్ సెంటర్లోకి తన వెంట ఇద్దరు ఏజెంట్లను లోపలికి అనుమతి ఇవ్వాలని బీఆర్ఎస్ అభ్యర్థి మాగంటి సునీత కోరారు. ఆమె అభ్యర్ధనకు పోలీసులు, ఎన్నికల సిబ్బంది అభ్యంతరం వ్యక్తం చేశారు. ఒక అభ్యర్థితో ఒక ఏజెంట్కు మాత్రమే అనుమతి ఇస్తున్నట్లు పోలీసులు స్పష్టం చేశారు. దీంతో సునీత వెంట ఒక ఏజెంట్ను మాత్రమే కౌంటింగ్ సెంటర్లోకి అనుమతి ఇచ్చారు సిబ్బంది.
కాగా, జూబ్లీహిల్స్ ఉప ఎన్నిక కౌంటింగ్కు సర్వం సిద్ధమైంది. శుక్రవారం (నవంబర్ 14) ఉదయం 8 గంటల నుంచి యూసఫ్గూడలోని కోట్ల విజయభాస్కర్ రెడ్డి స్టేడియంలో కౌంటింగ్ మొదలుకానుంది. ఓట్ల లెక్కింపుకు అధికారులు ఇప్పటికే అన్ని ఏర్పాట్లు పూర్తి చేశారు. మొదట పోస్టల్ బ్యాలెట్ ఓట్లు లెక్కించనున్నారు. ఆ తర్వాత ఈవీఎంలను ఓపెన్ చేయనున్నారు. ఉదయం 11.30 లోపు జూబ్లీహిల్స్ కింగ్ ఎవరనేది తెలిసిపోయే అవకాశం ఉంది.
