- కామారెడ్డి జిల్లాలో ఘోరం
- పాత కక్షలతోనే చంపారన్న కుటుంబసభ్యులు
నస్రుల్లాబాద్ : న్యూ ఇయర్ వేడుకల్లో కాంగ్రెస్పాట వద్దన్న బీఆర్ఎస్ లీడర్లను ప్రశ్నించినందుకు ఓ కాంగ్రెస్ నాయకుడిని చంపేశారు. ఈ ఘటన ఆదివారం రాత్రి కామారెడ్డి జిల్లా నస్రుల్లాబాద్ మండలం నాచుపల్లిలో జరిగింది. ఎస్ఐ లావణ్య కథనం ప్రకారం..గ్రామంలో న్యూ ఇయర్ సెలబ్రేషన్స్ నిర్వహించగా యువకులు డీజే పెట్టుకుని డ్యాన్సులు చేస్తున్నారు. ఈ సందర్భంగా కాంగ్రెస్కు సంబంధించిన పాట రావడంతో కొంతమంది బీఆర్ఎస్లీడర్లు అక్కడికి చేరుకొని సాంగ్ను ఆపాలని పట్టుబట్టారు. అక్కడే ఉన్న కాంగ్రెస్ లీడర్ సాదుల రాములు పాట ఎందుకు ఆపాలని ప్రశ్నించాడు. దీంతో బీఆర్ఎస్ లీడర్లు వాగ్వాదానికి దిగారు.
కాసేపటికి గొడవ సద్దుమణిగి అందరూ వెళ్లిపోయారు. మళ్లీ గ్రామంలోని ప్రైమరీ స్కూల్ దగ్గర బీఆర్ఎస్ లీడర్లు వినోద్కుమార్, రవి, గోపాల్, అనిల్, కాంగ్రెస్లీడర్ రాములతో గొడవ పెట్టుకున్నారు. రాములును తోసేయగా కింద పడి అక్కడికక్కడే చనిపోయాడు. బాన్సువాడ డీఎస్పీ జగన్నాథ్ రెడ్డి, బాన్సువాడ రూరల్ సీఐ మురళీ ఘటనా స్థలాన్ని పరిశీలించారు. కేసు నమోదు చేసినట్లు ఎస్ఐ లావణ్య తెలిపారు. పాత కక్షల కారణంగానే రాములును బీఆర్ఎస్ లీడర్లు చంపారని మృతుడి కుటుంబసభ్యులు ఆరోపించారు. రాములు మృతికి కారణమైన వారిని వెంటనే అదుపులోకి తీసుకోవాలని, అంతవరకు డెడ్బాడీని పోస్ట్మార్టం కోసం పంపేది లేదంటూ కుటుంబసభ్యులు ఆందోళనకు దిగారు. పారదర్శకంగా కేసును విచారించి నేరస్తులకు శిక్ష పడేలా చూస్తానని డీఎస్పీ జగన్నాథ్రెడ్డి హామీ ఇవ్వడంతో ఆందోళన విరమించారు.
