హైదరాబాద్, వెలుగు: అందాల పోటీలు ఆహ్లాదకరమైన వాతావరణంలో జరగాలిగానీ.. యుద్ధవాతావరణంలో కాదని బీఆర్ఎస్ పార్టీ అసెంబ్లీ విప్, ఎమ్మెల్యే కేపీ వివేకానంద్ అన్నారు. అందాల పోటీలకు మూడంచెల భద్రత కల్పిస్తామని ప్రభుత్వం షెడ్యూల్ ప్రకటించిందని, ఇలాంటి పరిస్థితుల్లో అందాల పోటీలు నిర్వహించడం మంచిది కాదని తెలిపారు. శనివారం ఆయన తెలంగాణ భవన్లో మీడియాతో మాట్లాడారు. రేవంత్ పాలనలో రాష్ట్రం పిచ్చోడి చేతిలో రాయిలా మారిందని చెప్పారు.
‘ఆపరేషన్ సిందూర్’ నేపథ్యంలో కగార్నూ నిలిపేశారని, ఆ ఆపరేషన్లో పాల్గొంటున్న బలగాలనూ కేంద్రం వెనక్కు పిలిచిందని పేర్కొన్నారు. సైన్యానికి సంఘీభావంగా దేశమంతా ర్యాలీలు జరుగుతుంటే.. సీఎం అందాల పోటీల క్యాట్వాక్ పోటీల్లో బిజీగా ఉన్నారని ఆరోపించారు. అందాల పోటీలు రాష్ట్ర భవిష్యత్తుకు కీలకమని ఓ చీఫ్ సెక్రటరీ స్థాయి అధికారి మాట్లాడొచ్చా అని ప్రశ్నించారు. రాష్ట్ర పరువును సీఎం దిగజారుస్తున్నారని విమర్శించారు. పాలన అంటే చిన్న పిల్లల ఆటనా అని, అభినవ నీరోలా రేవంత్ రెడ్డి వ్యవహరిస్తున్నారని వివరించారు.
