మహబూబాబాద్, వెలుగు: నిన్న మొన్నటి దాక కొట్లాడుకున్న నేతలు ఇప్పుడు కలిసిపోవడం మహబూబాబాద్ జిల్లా బీఆర్ఎస్ క్యాడర్ను ఆశ్చర్యపరుస్తున్నది. జిల్లాలోని డోర్నకల్, మహబూబాబాద్ సీట్లకు సిట్టింగ్ లనే అభ్యర్థులుగా ప్రకటించిన సంగతి తెలిసిందే. ఈ ఎమ్మెల్యేలు సొంత పార్టీలోనే అసమ్మతి ఎదుర్కొంటున్నారు. దీంతో హైకమాండ్ జోక్యం చేసుకుని ఎన్నికల్లో కలిసి పని చేయాలని ఆదేశించడంతో ఎమ్మెల్యేలు తమ ప్రత్యర్థుల ఇండ్లకు వెళ్లి సహకారం కోరడం.. వారు కూడా సానుకూలంగా స్పందించడం చర్చనీయాంశమైంది. డోర్నకల్ ఎమ్మెల్యే రెడ్యానాయక్కు.. ఇదే నియోజకవర్గానికి చెందిన ఎమ్మెల్సీ, మంత్రి సత్యవతి రాథోడ్తో విభేదాలున్నాయి. తనకు ఎమ్మెల్యేగా పోటీ చేసే అవకాశం వస్తే డోర్నకల్ నుంచే బరిలోకి దిగుతానని సత్యవతి ప్రకటించారు. మహబూబాబాద్ ఎమ్మెల్యే శంకర్ నాయక్కు మహబూబాబాద్ ఎంపీ మాలోతు కవితకు మధ్య కూడా తీవ్ర విభేదాలున్నాయి. శంకర్నాయక్, కవిత బహిరంగంగా గొడవ పడిన సందర్భాలు చాలా ఉన్నాయి.
విభేదాలకు తెరపడినట్లేనా?
విభేదాలు మరిచి ఎమ్మెల్యేలు లీడర్లను కలుపుకుపోవాలని హైకమాండ్ ఆదేశించింది. దీంతో రెడ్యానాయక్ హైదరాబాద్లో మంత్రి సత్యవతి ఇంటికి వెళ్లారు. ఆమెను సత్కరించి మద్దతు కోరారు. శంకర్నాయక్ మాలోతు కవిత ఇంటికి వెళ్లి సపోర్ట్ చేయాలని కోరారు. ఇంటికి వచ్చిన శంకర్నాయక్ను కవిత సన్మానించారు. ఇన్నాళ్లు వ్యతిరేకించిన ఎమ్మెల్సీ టి.రవీందర్రావు తోనూ సఖ్యతకు ప్రయత్నాలు చేస్తున్నారు. లీడర్లు కలిసిపోయినట్లు కనిపిస్తున్నా మొదటి నుంచి గొడవలు పడ్డ అనుచరులు ఎంతవరకు కలుస్తారనే వేచి చూడాలి.
