తెలంగాణ ప్రభుత్వం డ్రగ్స్ మహమ్మారిని అరికట్టేందుకు తీవ్రంగా కృషి చేస్తోంది. ఎక్కడికక్కడ తనిఖీలు నిర్వహిస్తూ డ్రగ్స్, గంజాయి స్మగ్లింగ్ ను కట్టడి చేస్తున్నారు పోలీసులు. అయినప్పటికీ తరచూ ఎక్కడో ఒక చోట డ్రగ్స్, గంజాయి అక్రమ రవాణా వెలుగులోకి వస్తూనే ఉంది. ఈ క్రమంలో భద్రాద్రి కొత్తగూడెం జిల్లాలో గంజాయి అక్రమ రవాణా వెలుగులోకి వచ్చింది. అయితే.. గంజాయి తరలిస్తున్న కారులో మంటలు రావడంతో కారును అక్కడే వదిలేసి వెళ్లిపోయారు నిందితులు. మంగళవారం ( అక్టోబర్ 14 ) జరిగిన ఈ ఘటనకు సంబంధించి వివరాలిలా ఉన్నాయి...
భద్రాద్రి కొత్తగూడెం జిల్లాలోని పాల్వంచలో అయ్యప్ప స్వామి గుడి దగ్గర జరిగింది ఈ ఘటన. గంజాయి తరలిస్తున్న కారులో ఒక్కసారిగా మంటలు చెలరేగాయి. నడిరోడ్డుపై కారులో మంటలు చెలరేగడంతో స్థానికులు గుమిగూడారు. దీంతో భయపడ్డ నిందితులు కారు అక్కడే వదిలేసి వెళ్లిపోయారు.
►ALSO READ | పోలీసులకు పాస్వర్డ్ చెప్పాల్సిందే: ఫోన్ ట్యాపింగ్ కేసులో ప్రభాకర్ రావుకు సుప్రీంకోర్టు కీలక ఆదేశాలు
ఈ ఘటనపై పోలీసులకు సమాచారం అందించారు స్థానికులు. ఘటనాస్థలికి చేరుకున్న పోలీసులు కారును స్వాధీనం చేసుకొని స్టేషన్ కి తరలించారు. ఈ ఘటనపై కేసు నమోదు చేసిన పోలీసులు దర్యాప్తు చేస్తున్నారు. పరారీలో ఉన్న నిందితుల కోసం గాలిస్తున్నారు పోలీసులు.
