- బంగారం, డబ్బు ఆశతో
- వృద్ధురాలి కండ్లు పోగొట్టిన కేర్టేకర్
- నిందితురాలిని అరెస్టు చేసిన పోలీసులు
- బంగారు నగలు, రూ.40 వేలు స్వాధీనం
ఉప్పల్, వెలుగు: బంగారం, డబ్బు కొట్టేసేందుకు వృద్ధురాలి కండ్లు పోగొట్టిన కేర్టేకర్ను నాచారం పోలీసులు అరెస్ట్ చేశారు. స్నేహపురి కాలనీలోని శ్రీనిధి అపార్ట్మెంట్లో ఉండే సిరికొండ హేమలత (73) కొడుకు శశిధర్ లండన్లో ఉంటున్నాడు. ఆమెకు కేర్టేకర్గా మంచిర్యాల జిల్లా మందమర్రికి చెందిన పెరికె భార్గవి (32) గత ఆగస్టు నుంచి పని చేస్తూ అక్కడే తన ఏడేండ్ల కూతురితో కలిసి ఉంటోంది. హేమలత ఇంట్లో బంగారం , డబ్బును చూసిన భార్గవి కొట్టేయాలని స్కెచ్ వేసింది. హేమలతకు తరుచూ కండ్లలో నీరు వస్తూ ఇబ్బందులు పడేది. ఇదే అవకాశంగా చేసుకున్న భార్గవి గతేడాది అక్టోబర్ చివరి వారం నుంచి వరుసగా 4 రోజుల పాటు బాత్రూమ్ క్లీనర్, జండూబామ్ను నీటిలో కలిపి దాన్ని ఐ డ్రాప్స్ అని నమ్మించి హేమలత కండ్లలో వేసింది.
దీంతో ఆమె రెండు కండ్లు పోయాయి. హేమలతకు కండ్లకు ఇన్ ఫెక్షన్ సోకిందని.. కనిపించట్లేదని చెప్తోందని లండన్లో ఉన్న ఆమె కొడుకు శశిధర్కు కాల్ చేసి భార్గవి చెప్పింది. ఆ తర్వాత బీరువాలోని బంగారం, డబ్బు తీసుకుంది. ఎవరికీ అనుమానం రాకుండా జాగ్రత్త పడింది. గత నెల 14న శశిధర్ లండన్ నుంచి సిటీకి వచ్చి హేమలతను ఎల్వీ ప్రసాద్ ఐ హాస్పిటల్లో చేర్పించాడు. ఆమె కండ్లకు విషప్రయోగం జరిగిందని డాక్టర్లు చెప్పారు. శశిధర్ వెంటనే భార్గవి రూమ్లో చెక్ చేయగా బ్యాగ్లో ఆరున్నర తులాల బంగారు నగలు కనిపించాయి. దీంతో పోలీసులకు కంప్లయింట్ చేయగా ఆమెను అదుపులోకి తీసుకొని విచారించారు. తానే ఈ పని చేసినట్లు భార్గవి ఒప్పుకుంది. బంగారు నగలు, రూ.40 వేల క్యాష్ను స్వాధీనం చేసుకుని కేసు ఫైల్ చేశారు. నిందితురాలిని రిమాండ్కి తరలించినట్లు నాచారం ఇన్స్పెక్టర్ కిరణ్ కుమార్ తెలిపారు.
