కోపిష్టి పిల్లి చచ్చిపోయింది. పిల్లి చచ్చిపోతే కూడా వార్త అవుతుందా అనొచ్చు. ఈ పిల్లి విషయంలో మాత్రం అది వార్తే. ఎందుకంటే దీనికి ఉన్న క్రేజ్ అంతా ఇంతా కాదు మరి. దాని మొహం చూశారుగా. గుడ్లు మిటకరించి కోపంగా చూస్తూ బెదిరించినట్టు లేదూ. దాని మీద కార్టూన్లు, మీమ్స్, బుక్కులు, మూవీ వచ్చాయంటే దాని ఫేస్ ఎంత ఫేమస్సో అర్థం కావట్లేదూ. 2012లో తొలిసారిగా యూట్యూబ్ వీడియోతో క్రేజ్ సంపాదించిందీ పిల్లి. దీని అసలు పేరు టార్డర్ సాస్. హోటల్లో వెయిట్రెస్గా పనిచేస్తున్న తన ఓనరమ్మను కోటీశ్వరురాలిని చేసి పైసల కష్టాలను తీర్చింది. రూ.703 కోట్లు (10 కోట్ల డాలర్లు) సంపాదించిపెట్టింది. కొన్ని రోజులుగా ఇన్ఫెక్షన్తో బాధపడుతున్న టార్డర్ సాస్.. ఏడేళ్ల వయసులో చనిపోయింది. ఈ విషయాన్ని అమెరికా మోరిస్టౌన్లో ఉండే తన ఓనర్ తబతా బుందీసెన్ ఇన్స్టాగ్రామ్లో ఈ కోపిష్టి పిల్లి మరణవార్తను తెలిపింది.
మూత్రకోశ ఇన్ఫెక్షన్తో మే 14న చనిపోయినట్టు చెప్పింది. దీంతో దాని ఫ్యాన్స్ చాలా బాధపడ్డారు. నెట్లో దానికి నివాళులర్పించారు. కాగా, 2012లో తబతా సోదరుడు ఈ కోపిష్టి పిల్లి ఫొటోలు, వీడియోలను రెడిట్లో పెట్టడంతో వైరల్ అయింది. ఆ తర్వాత దానికి సంబంధించిన వీడియోను యూట్యూబ్లో పోస్ట్ చేశారు. అప్పటి నుంచి దాని క్రేజ్ అమాంతం పెరిగిపోయింది. దానిపేరు మీద 2013లో గ్రంపీ క్యాట్: ఏ గ్రంపీ బుక్ అనే పుస్తకం వచ్చింది. దానికి ఫాలోఅప్గా వచ్చిన ద గ్రంపీ గైడ్ టు లైఫ్: అబ్జర్వేషన్స్ బై గ్రంపీ క్యాట్ అనే పుస్తకం బెస్ట్సెల్లర్ లిస్టులో మూడో స్థానాన్ని సంపాదించింది. 2014లో హాలీవుడ్లో ఎంట్రీ ఇచ్చింది. వరస్ట్ క్రిస్మస్ ఎవర్ అనే సినిమాలో నటించింది. మరి, దానికి ఎందుకు ఆ రూపం వచ్చిందంటే.. మరుగుజ్జుతనం వల్ల. సరిగ్గా అభివృద్ధి కాని దవడలతో దానికి ఆ కోపిష్టి రూపం వచ్చిందని అక్కడి పశు వైద్యులు చెబుతున్నారు.
