ఈ ఏడాది కూడా రూ.1913 కోట్లే కేటాయించిన కేంద్రం
హైదరాబాద్, వెలుగు: రాష్ట్రానికి సమగ్ర శిక్ష(ఎస్ఎస్ఏ) ద్వారా ఇచ్చే నిధులను కేంద్ర ప్రభుత్వం ఈ సారి పెంచలేదు. ఈ ఆర్థిక సంవత్సరంలో ఇస్తామని అంగీకరించిన రూ.1913 కోట్లనే వచ్చే 2024–25 సంవత్సరం కూడా ఇస్తామని తెలిపింది. 2024–25 ఏడాదికిగానూ ఈ నెల15,16 తేదీల్లో ఢిల్లీలో సమగ్ర శిక్ష ప్రాజెక్టు అవ్రూవల్ బోర్డు (పీఏబీ) సమావేశం జరిగింది.
దీనికి తెలంగాణ నుంచి స్కూల్ ఎడ్యుకేషన్ కమిషనర్ శ్రీదేవసేన, సమగ్రశిక్ష ఏఎస్పీడీ రమేశ్ తదితరులతో కూడిన టీం అటెండ్ అయ్యింది. 2024–25 సంవత్సరానికిగానూ రూ.2500 కోట్ల ప్రపోజల్స్ పెట్టగా, కేంద్రం మాత్రం రూ.1913 కోట్లకే కమిట్మెంట్ ఇచ్చినట్టు అధికారులు తెలిపారు. గతంలోని అంశాలే ఈ సారి కూడా కొనసాగనున్నాయి.
అయితే, సమగ్ర శిక్ష పరిధిలో పనిచేస్తున్న సుమారు 22వేల మంది కాంట్రాక్టు ఎంప్లాయీస్కు జీతాలు పెంచుతారనే ఆశలు ఉండేవి. కానీ, గతేడాది బడ్జెట్ నే ఇస్తామన్న సూచనలతో జీతాలు పెంచే ప్రతిపాదనలను అధికారులు చేయలేదు.
