నిర్మల్/ఆదిలాబాద్/కడెం,వెలుగు: వర్షాలు... వరదల కారణంగా దెబ్బతిన్న ప్రాజెక్టులు, ఆస్తుల వివరాలు తెలుసుకునేందుకు శుక్రవారం ఉమ్మడి జిల్లాలో కేంద్ర బృందం పర్యటించింది. నిర్మల్ జిల్లా కడెం ప్రాజెక్టు దెబ్బతిన్న 18 గేట్లు, మైసమ్మ ఆలయం వద్ద పడ్డ గండి, పాండ్వపుర్ వంతెన వద్ద తెగిన రోడ్డును సభ్యులు చూశారు. గేట్ల పరిస్థితిపై ఇరిగేషన్ఆఫీసర్లతో మాట్లాడారు.
ప్రాజెక్టు మరమ్మతుల కోసం అయ్యే ఖర్చుల వివరాలు కలెక్టర్ ముషారఫ్ అలీ ఫారూఖీ వారికి వివరించారు. తక్షణ రిపేర్ల కోసం రూ.3.5 కోట్లు అవసరమని పేర్కొన్నారు. జిల్లాలో 25 వేల ఎకరాల్లో పంట నష్టం జరిగిందని, ఫలితంగా రూ.19. 76 కోట్ల నష్టం జరిగిందని కలెక్టర్తెలిపారు. 734 చెరువులు దెబ్బతిన్నాయని, ఆర్ అండ్ బీకి చెందిన నాలుగు వంతెనలు,11 రోడ్లు, పంచాయతీ రాజ్శాఖకు సంబంధించిన 69 రోడ్లు దెబ్బతినడంతో దాదాపు రూ.30 కోట్ల నష్టం జరిగిందన్నారు.
ఆదిలాబాద్ జిల్లాలో ఉట్నూర్, ఇంద్రవెల్లి, నేరడిగొండ, ఇచ్చోడ మండలాల్లో రోడ్లు, పంట పొలాలు, బ్రిడ్జీలను సెంట్రల్టీం పరిశీలించింది. సభ్యులు రైతులతో మాట్లాడి వివరాలు తెలుసుకున్నారు. జరిగిన నష్టంపై కేంద్ర ప్రభుత్వానికి నివేదిస్తామని సెంట్రల్ హోమ్ అఫైర్స్ జాయింట్ సెక్రటరీ సౌరవ్ రాయ్ తెలిపారు.
కార్యక్రమంలో బృందం సభ్యులు దీప్ శేఖర్ సింగల్, కృష్ణ ప్రసాద్, నిర్మల్, ఆదిలాబాద్ కలెక్టర్లు ముషరఫ్అలీ ఫారూఖీ, సిక్తా పట్నాయక్, అడిషనల్కలెక్టర్లు హేమంత్బోర్కడే, రిజ్వాన్ బాషా షేక్, నటరాజన్, ఇరిగేషన్ ఎస్ఈ సుశీల్ దేశ్ పాండే, ఈఈ రాజశేఖర్, డీఈ బోజదాసు, తహసీల్దార్రాథోడ్ మోహన్ సింగ్, ఏవో కైలాశ్, పీఆర్ డీఈ శైలేందర్ తదితరులు ఉన్నారు.
