- రెండంకెల గ్రోత్ వైపు చూపు
- చైర్మన్ సిద్ధార్థ మొహంతి వెల్లడి
న్యూఢిల్లీ : కొత్త బిజినెస్ ప్రీమియంలో రెండంకెల గ్రోత్ సాధించే దిశలో లైఫ్ ఇన్సూరెన్స్ కార్పొరేషన్ (ఎల్ఐసీ) అడుగులు వేస్తోంది. ఈ దిశలో రాబోయే నెలల్లో మూడు, నాలుగు కొత్త పాలసీలు తెచ్చే ఆలోచనలో ఉంది. కిందటేడాదితో పోలిస్తే ఈ ఫైనాన్షియల్ ఇయర్లో కొత్త బిజినెస్ ప్రీమియంలో రెట్టింపు గ్రోత్ సాధించాలనే టార్గెట్తో పనిచేస్తున్నట్లు ఎల్ఐసీ చైర్మన్ సిద్ధార్థ మొహంతి వెల్లడించారు. ఇండివిడ్యువల్ రిటైల్ బిజినెస్ ఇటీవలి కాలంలో పెరుగుతున్న సంకేతాలు కనిపిస్తున్నాయని, అందుకే తాము టార్గెట్లను చేరుకోగలమనే ధీమాతో ఉన్నామని చెప్పారు.
తేబోయే కొత్త ప్రొడక్టులు ఆకర్షణీయమైనవిగా ఉంటాయని పేర్కొన్నారు. డిసెంబర్ మొదటి వారంలో ఒక కొత్త ప్రొడక్టును తెస్తామని, మార్కెట్లో ఈ ప్రొడక్టు మంచి ఆదరణ పొందుతుందనే ఆశాభావాన్ని మొహంతి వ్యక్తం చేశారు. ఈ కొత్త ప్రొడక్టు వివరాలను కొన్నింటిని ఆయన పంచుకున్నారు. ఎష్యూర్డ్ రిటర్న్స్ ఇవ్వడంతోపాటు, మెచ్యూరిటీ తర్వాత పాలసీ హోల్డర్ సమ్ ఎష్యూర్డ్లో 10 శాతాన్ని జీవితాంతం పొందే వీలుంటుందని పేర్కొన్నారు. ఈ ప్రొడక్టు కచ్చితంగా మార్కెట్లో ఒక సంచలనమవుతుందని చెప్పారు.
ఎందుకంటే, తాము ఇప్పుడు కడుతున్న ప్రీమియంపై తమకు 20–25 ఏళ్ల తర్వాత ఏ విధమైన రిటర్న్స్ వస్తాయనే దానిపై అందరికీ ఆసక్తి ఉంటుందని అన్నారు. లోన్ ఫెసిలిటీతోపాటు, ప్రీ మెచ్యూర్ విత్డ్రాయల్ కూడా కొత్త ప్రొడక్టులో ఉండే ఫీచర్లని మొహంతి వెల్లడించారు. పాలసీ హోల్డర్లు, షేర్ హోల్డర్లకు గ్యారంటీడ్ రిటర్న్ ప్రొడక్టులు మేలు కలిగిస్తాయని పేర్కొన్నారు. ఎల్ఐసీ షేర్ హోల్డర్లలో చాలా మంది పాలసీ హోల్డర్లు కూడా ఉన్నారని
వారికి రెండు రకాల ప్రయోజనం కలుగుతుందని వివరించారు. ఆ తర్వాత నెలల్లో మరో రెండు, మూడు కొత్త ప్రొడక్టులను మార్కెట్లోకి తెస్తామని చెప్పారు.ఈ ఏడాది మొదటి ఆరు నెలల్లో ఎల్ఐసీ కొత్త బిజినెస్ ప్రీమియం ఇన్కం 2.65 శాతం గ్రోత్తో రూ. 25,184 కోట్లకు చేరింది. ఐఆర్డీఏఐ లెక్కల ప్రకారం కొత్త బిజినెస్ ప్రీమియం ఇన్కంలో ఎల్ఐసీకి 58.50 శాతం వాటాతో మార్కెట్ లీడర్గా ఉంది. .
