ఒక్కరోజే 200 ఇండిగో విమానాలు రద్దు.. హైదరాబాద్ లో రద్దు అయిన విమానాల లిస్ట్ ఇదే..

ఇండిగోలో గందరగోళం కొనసాగుతోంది. సిబ్బంది కొరత కారణంగా బుధవారం పలు విమానాలు రద్దు చేసిన ఇండిగో సంస్థ గురువారం ( డిసెంబర్ 4 ) కూడా భారీ సంఖ్యలో విమానాలను రద్దు చేసినట్లు తెలిపింది. దేశవ్యాప్తంగా వివిధ ఎయిర్ పోర్టుల నుంచి ఇండిగో విమానాలు రద్దు చేస్తున్నట్లు తెలిపింది సంస్థ. దేశంలోనే అతిపెద్ద విమానయాన సంస్థ అయినా ఇండిగో విమాన సర్వీసులకు ఢిల్లీ, ముంబై, హైదరాబాద్ సహా ఇతర నగరాల్లో అంతరాయం కలిగింది. ఈ క్రమంలో వేలాది మంది ప్రయాణికులు విమానాశ్రయాల్లో చిక్కుకొని ఇబ్బంది పడ్డారు.

గురువారం తెల్లవారుజామున ఢిల్లీ నుంచి బయలుదేరాల్సిన 30కి పైగా ఇండిగో విమానాలు రద్దు చేసినట్లు తెలిపింది ఇండిగో. హైదరాబాద్ లో కూడా 33 విమానాలు రద్దు చేసినట్లు తెలిపింది ఇండిగో. ముంబై ఎయిర్ పోర్టులో నుంచి 170కి పైగా విమానాలు రద్దయ్యే అవకాశం ఉందని తెలుస్తోంది. బుధవారం ఢిల్లీ, ముంబై, బెంగుళూరు, హైదరాబాద్ ఎయిర్ పోర్టుల నుంచి 200 విమానాలు రద్దు చేసినట్లు తెలిపింది ఇండిగో.

రోజుకు దాదాపు 2 వేల 200 విమానాలను నడుపుతున్న ఇండిగో సాంకేతిక లోపం కారణంగా పలు సర్వీసులు రద్దు చేయాల్సి వచ్చిందని.. ఇందుకు గాను కస్టమర్లకు హృదయపూర్వకంగా క్షమాపణలు కోరుతున్నట్లు తెలిపింది ఇండిగో.