- కేటీఆర్ ఇలాకాలో కొట్టుకుపోతున్న చెక్డ్యాంలు
- పనులు సబ్ కాంట్రాక్ట్కు ఇస్తున్న పెద్ద కంపెనీలు
- ఇసుకపైనే కడుతుండడంతో నిలబడని నిర్మాణాలు
రాజన్నసిరిసిల్ల, వెలుగు: రాజన్నసిరిసిల్ల జిల్లాలో రూ.100 కోట్ల ప్రజాధనం నీళ్ల పాలవుతోంది. నీటిని నిలిపి ఉంచాల్సిన చెక్డ్యాంలు చిన్నపాటి వరదలకే కొట్టుకుపోతున్నాయి. మూడు నెలల క్రితం తంగళ్లపల్లి మండలం కస్బె కట్కూర్లో రూ.11 కోట్లతో నిర్మిస్తున్న చెక్ డ్యాం నిర్మాణ దశలోనే చిన్నపాటి వరదకే రెండు ముక్కలైంది. ఇది మరవకముందే సిరిసిల్ల జిల్లా కేంద్రానికి సమీపంలో మానేరు వాగుపై మూడు నెలల క్రితం నిర్మించిన చెక్ డ్యాం కొట్టుకుపోయింది. వీకెండ్తో పాటు.. ప్రతిరోజు జనం ఈ చెక్ డ్యాం కింద స్నానాలు చేయడం, పిల్లా పాపలతో సందర్శకులు ఎంజాయ్ చేస్తుంటారు. అదృష్టవశాత్తు శుక్రవారం తెల్లవారుజామున కొట్టుకుపోయింది. అదే జనం ఉన్నప్పుడు కొట్టుకుపోయి ఉంటే ప్రజల ప్రాణాలకు ప్రమాదం వాటిల్లేదని స్థానికులు వాపోతున్నారు.
డిజైన్ లోపం.. క్వాలిటీ నిల్
రాజన్నసిరిసిల్ల జిల్లా కేటీఆర్ ఇలాకాలో రూ.100 కోట్లకు పైగా వెచ్చించి నిర్మిస్తున్న చెక్ డ్యాంల నాణ్యతపై పలు అనుమానాలు వ్యక్తమవుతున్నాయి. పనులు దక్కించుకుంది ఒకరైతే.. వాటిని సబ్కాంట్రాక్టర్లు.. లోకల్లీడర్లు చేస్తున్నారు. దీనికి తోడు డిజైన్లోపం స్పష్టంగా కనిపిస్తోంది. మానేరు వాగులో 10 నుంచి 12 మీటర్ల లోతు వరకు ఇసుక ఉంటే కేవలం 7 ఫీట్ల డెప్త్ నుంచే చెక్డ్యాం నిర్మాణాలు చేపట్టారు. ఇలాంటి చెక్డ్యాంలలో నీటి స్టోరేజి కూడా కష్టమేనని, కింద ఇసుక నుంచి ఊటలు పడి.. నీరు ఆగదని నిపుణులు పేర్కొంటున్నారు. 800 మీటర్ల పొడవు ఉన్న చెక్ డ్యాంలు సైతం ఇలాంటి లోపాలతో నిర్మించడంపై విమర్శలు వెల్లువెత్తుతున్నాయి. ఇసుక మొత్తం తీసి.. భూమి లెవల్నుంచి కడితే కానీ ఈ చెక్ డ్యాంలు నిలవడం కష్టమని నిపుణులు పేర్కొంటున్నారు. కనీసం 50 ఏళ్ల వరద స్థాయిని దృష్టిలో ఉంచుకొని చెక్డ్యాంలు నిర్మించాల్సి ఉండగా ఇవేం పట్టనట్లు.. రాష్ట్రం మొత్తం సేమ్డిజైన్ఇచ్చి చెక్ డ్యాంలు నిర్మిస్తున్నట్లు సమాచారం. రాజన్నసిరిసిల్ల జిల్లాలో నిర్మిస్తున్న సుమారు 22 చెక్ డ్యాంలలో మెజార్టీ పనులు ఒకటే కంపెనీ దక్కించుకోవడం గమనార్హం. ఈ సంస్థ పేరు మీద పలువురు సబ్కాంట్రాక్టర్లు పనులు చేస్తున్నారు.
రెండు చెక్డ్యాంలు.. రూ. 22 కోట్ల నష్టం
తంగళ్లపల్లి మండలం కస్బెకట్కూర్లో రెండు నెలల క్రితం రెండు ముక్కలైన చెక్ డ్యాంతో పాటు శుక్రవారం కొట్టుకుపోయిన చెక్ డ్యాంల నిర్మాణ వ్యయం రూ.22 కోట్లు. కూలినచోట రిపేర్లు చేసినా అవి ఎంతకాలం నిలబడతాయన్నది చెప్పలేని పరిస్థితి. ప్రస్తుతం కూలిన చెక్డ్యాంలను కాంట్రాక్టర్లతోనే నిర్మింపజేస్తామని ఆఫీసర్లు చెబుతున్నారు. అయితే కాంట్రాక్టర్లు మాత్రం డిజైన్ లోపం ఉందని.. తామేందుకు ఖర్చు భరిస్తామమని పేర్కొంటున్నారు. ప్రస్తుతం ఉన్న డిజైన్తో చెక్డ్యాంలు నిర్మిస్తే వరద ఉధృతిని తట్టుకోలేవని, నీరు కూడా నిల్వ ఉండదని నిపుణులు పేర్కొంటున్నారు. ప్రభుత్వం స్పందించి చెక్డ్యాంల నిర్మాణాలపై రివ్యూ చేయాలని సూచిస్తున్నారు.
విచారణ జరుపుతున్నం
సిరిసిల్ల చెక్ డ్యాం కూలిపోవడంపై విచారణ జరుపుతున్నం. ఎన్నడూ రానంత వరద రావడం వల్లే చెక్ డ్యాం కూలింది. పాత కాంట్రాక్టర్తోనే నిర్మించేలా చర్యలు తీసుకుంటాం. డిజైన్ విషయం ఈఎన్సీ పరిధిలోనిది. విచారణ అనంతరం అన్ని విషయాలు తెలియజేస్తాం.
- అమరేందర్రెడ్డి, ఈఈ ఇరిగేషన్, రాజన్నసిరిసిల్ల
