న్యూఢిల్లీ: దేశ రాజధాని ఢిల్లీలో జల్బోర్డు కు సంబంధించిన బోర్ వెల్లో పడి ఒక వ్యక్తి మృతిచెందారు. ఢిల్లీ మంత్రి అతీషి ‘ఎక్స్’లో ఈ విషయాన్ని వెల్లడించారు. ఘటనపై ఎంక్వైరీ జరిపి బాధ్యులపై కఠిన చర్యలు తీసుకోవాలని ఆదేశించారు. శనివారం కేశోపూర్లో ఢిల్లీ జల్బోర్డుకు చెందిన ఎస్టీపీ (సేవేజ్ ట్రీట్మెంట్ ప్లాంట్) బోర్ వెల్లో ఒక చిన్నారి పడినట్లు అధికారులకు సమాచారం అందింది. ఎన్డీఆర్ఎఫ్, ఫైర్ సిబ్బంది ఘటనా స్థలానికి చేరుకొని శనివారం అర్ధరాత్రి నుంచి రెస్యూ పనులు చేపట్టారు.
40 అడుగుల లోతు ఉన్న బోర్వెల్కు సమాతరంగా పక్కనే మరో గొయ్యి తీయడం స్టార్ట్ చేశారు. ఆదివారం మధ్యహ్నం 3 గంటల తర్వాత బాధితుడిని బయటకు తీశారు. బావిలో చిన్నారి పడినట్లు మొదట ప్రచారం జరిగినప్పటికీ.. బాధితుడిని 40 ఏండ్ల వ్యక్తిగా గుర్తించారు. అయితే అతను అప్పటికే చనిపోయాడు.
