ఏ సినిమా పాటైనా..అది ఎంత పెద్ద బ్లాక్ బస్టర్ అయినా... అందరి చూపు ఆ పాటలో కనిపించిన హీరోహీరోయిన్లపైనే ఉంటుంది. ఎప్పుడో ఒకసారి ఆ పాట కట్టిన వాళ్లు, దానికి స్టెప్పులు వేయించిన వాళ్ల పేర్లు వినపడతాయి. కానీ, బాహుబలిలోని ‘కన్నా నిదురించరా...’ పాట చూసినవాళ్లంతా అనుష్క నుంచి ఓ క్షణం చూపు తిప్పుకుంటారు. ఆ పాటలో అనుష్కతో పాటు డాన్స్ చేసిన అశ్రిత వేముగంటి దగ్గర అందరి చూపులు ఆగిపోతాయి. ఆ పాటతో పాటు ‘యాత్ర, క్రాక్, డియర్ కామ్రేడ్’ లాంటి మరెన్నో సినిమాల్లో తన అందం, అభినయంతో ఆకట్టుకుంది. ఈ క్లాసికల్ డాన్సర్ త్వరలో ‘గాలివాన’ వెబ్సిరీస్తో అందరి ముందుకి రాబోతోంది. ఆ విశేషాలన్నీ ఆమె మాటల్లోనే..
అమ్మ డాక్టర్, సైంటిస్ట్. నాన్న సాఫ్ట్వేర్లో మేనేజ్మెంట్ కన్సల్టెంట్. మిగతా ఫ్యామిలీ మెంబర్స్ కూడా పెద్ద చదువులు చదువుకున్నారు. ఇలాంటి వాతావరణంలో పెరిగే పిల్లలపై చాలా ఎక్స్పెక్టేషన్స్ ఉంటాయి. వాటికి తగ్గట్టే చిన్నప్పట్నించీ అకడమిక్స్లో బాగా స్కోర్ చేసేదాన్ని. నాకిష్టమైన భరతనాట్యం, కూచిపూడిల్లో ప్రదర్శనలిస్తుండేదాన్ని. ఈ రెండింటి మధ్యే తిరుగుతున్న నా లైఫ్ని మరో మలుపు తిప్పింది ‘బాహుబలి’ సినిమా. అది కూడా వెతుక్కుంటూ వచ్చి మరీ. దానికి కారణం కూడా నా డాన్స్. ఐదేండ్ల వయసులో కాలికి కట్టిన గజ్జలే నన్ను సిల్వర్ స్ర్కీన్ వరకు నడిపించాయి. క్యారెక్టర్ ఆర్టిస్ట్గా నాకంటూ ఒక ప్రత్యేక గుర్తింపును ఇచ్చాయి.
టీవీ చూస్తూ
ఐదేండ్లు ఉన్నప్పుడు టీవీలో డాన్స్లు చూసి నేను చేస్తుంటే.. రిథమ్ బాగుండటంతో క్లాసికల్ డాన్స్ నేర్పించింది అమ్మ. అలా ప్రియ కార్తికేయన్ దగ్గర పదేండ్లు భరతనాట్యం నేర్చుకున్నా. ఆ తర్వాత డాక్టర్ రాజేశ్వరి దగ్గర ట్రైన్ అయ్యా. చెన్నైలోని కూచిపూడి ఆర్ట్ అకాడమీలో కూచిపూడి నేర్చుకున్నా. అయితే చిన్నప్పట్నించీ డాన్స్తో సమానంగా చదువుని ప్రేమించా. స్కూల్ నుంచి గ్రాడ్యుయేషన్ వరకు అన్నింట్లో టాపర్ని. గ్రాడ్యుయేషన్లో సైకాలజీ పూర్తిచేశాక డాన్స్ గురించి మరింత తెలుసుకోవాలనుకున్నా. శోభన లైవ్ డాన్స్ పర్ఫార్మెన్స్లు, ఆమె నటించిన ‘డాన్స్ లైక్ ఎ మెన్’ అనే ఫిల్మ్ చూసి ఇన్స్పైర్ అయ్యా. యూట్యూబ్లో అలర్మేల్వల్లి, మల్లికా సారాభాయ్ పర్ఫార్మెన్స్లు చూశాక.. అసలు డాన్స్ ఎక్కడ మొదలైంది అన్న ప్రశ్న మొదలైంది. దానికి సమాధానం వెతుక్కుంటూ చెన్నై వెళ్లి మద్రాసు యూనివర్సిటీలో పర్ఫార్మింగ్ ఆర్ట్స్లో భరతనాట్యంలో మాస్టర్స్ చేశా. కూచిపూడి కూడా నేర్చుకున్నా. ఆ రెండేండ్ల జీవితం అప్పటివరకు ఉన్న నా జీవితాన్ని పూర్తిగా మార్చేసిందని చెప్పొచ్చు. చెన్నైలో నేను ఇచ్చిన పర్ఫార్మెన్స్లు చూసి ఏ.ఆర్. మురగదాస్ గారితో పాటు చాలామంది సినిమా ఆఫర్స్ ఇచ్చారు. కానీ, యాక్టింగ్ ఆలోచన లేకపోవడంతో వాటన్నింటినీ వద్దనుకొని మాస్టర్స్లో గోల్డ్ మెడల్తో తిరిగి హైదరాబాద్ షిఫ్ట్ అయ్యా.
వాళ్ల కంట్లో పడ్డా
నాతో పాటు మాస్టర్స్ చేసినవాళ్లలో చాలామంది డాన్స్ స్కూల్స్ పెట్టుకున్నారు. మరికొందరు పర్ఫార్మింగ్ ఆర్గనైజేషన్స్లో చేరారు. ఇంకొందరు పీహెచ్డీ వైపు వెళ్లారు. ‘నెక్స్ట్ ఏంటి?’ అని ఆలోచించా. ఆ టైంలో ‘నీ స్ర్కీన్ ప్రజెన్స్ బాగుంటుంది.. టీవీ ఇండస్ట్రీ వైపు వెళ్లొచ్చు’గా అని తెలిసినవాళ్లు అన్నారు. దాంతో ‘టాలీవుడ్’ అనే ఛానెల్లో యాంకర్గా చేరా. ఆ తర్వాత ‘ఎస్వీబీసీ’లో ‘గీతాంజలి’ అనే ప్రోగ్రాం హోస్ట్ చేశా. నా యాంకరింగ్ కెరీర్ని మరో మలుపు తిప్పింది కె. విశ్వనాథ్గారితో చేసిన డాక్యుమెంటరీలు, షోలు. ఆ షో పూర్తయ్యాక రాజమౌళి గారి నుంచి పిలుపు వచ్చింది. అదెలాగంటే ‘అంతకుముందు ఆ తరువాత’ సినిమా ఆడియో ఫంక్షన్లో డాన్స్ పర్ఫార్మెన్స్ ఇచ్చా. ఆ ఫంక్షన్కి గెస్ట్గా రాజమౌళిగారి ఫ్యామిలీ అందరూ వచ్చారు. అక్కడే ఆయన నన్ను చూశారట. ఆ ఫంక్షన్ అయిన నెలకి నాకు కార్తికేయ నుంచి ఫోన్ ‘ మీరు ఇంతకుముందు ఏమైనా సినిమాలు చేశారా? అని అడిగారాయన. ‘లేదు’ అన్నా. ‘పోనీ ఇంట్రెస్ట్ ఉందా? ఒక రోల్ అనుకుంటున్నాం చేస్తారా?’ అని అడిగారు. ఇంట్లో వాళ్లని ఎలాగోలా ఒప్పించి స్ర్కీన్ టెస్ట్కి వెళ్లా. అక్కడ ఒక డాన్స్ స్కిట్ ఇవ్వడం.. అందులో నా పర్ఫార్మెన్స్ వాళ్లకి నచ్చడంతో వెంటనే ‘ఓకే’ చేశారు.
సెలక్టెడ్గా వెళ్తున్నా
బాహుబలి రిలీజ్ అయ్యాక వరుసకట్టి సినిమా అవకాశాలొచ్చాయి. కానీ, సెలక్టెడ్గా వెళ్లాలనుకున్నా. నా కెరీర్ని ఒక మెట్టు పైకి ఎక్కించే క్యారెక్టర్స్ మాత్రమే చేయాలనుకున్నా. అలా నేను ఎంచుకున్న ‘యాత్ర’ సినిమా నన్ను యాక్టర్గా మరింత మందికి దగ్గరకు చేసింది. అలాగే ‘డియర్ కామ్రేడ్, క్రాక్,’ కన్నడలో చేసిన ‘కురుక్షేత్ర’ సినిమాలు కూడా మంచి పేరు తెచ్చిపెట్టాయి. ప్రస్తుతం బీబీసి స్టూడియోస్‌, నార్త్‌‌స్టార్‌ ఎంటర్‌‌టైన్‌‌మెంట్‌ కలిసి నిర్మిస్తున్న ‘గాలివాన’ వెబ్సిరీస్లో నటిస్తున్నా. అలాగే ఇంకొన్ని ప్రాజెక్ట్స్ చేతిలో ఉన్నాయి. అయితే ఇప్పటివరకు నేను చేసిన క్యారెక్టర్స్ అన్నీ నా వయసుకి మించినవే. నా ఏజ్ క్యారెక్టర్ ఒక్కటీ రాలేదు నాకు. అయితే ఇది నా ఒక్కదాని పరిస్థితి కాదు. ప్రస్తుతం ఇండస్ట్రీలో ఉన్న లేడీ క్యారెక్టర్ ఆర్టిస్ట్లలో చాలామంది 20, 30 యేండ్లకే మదర్ క్యారెక్టర్స్ వేస్తున్నారు. కానీ, నాకెందుకో ఈ ఫార్మాట్ కరెక్ట్ అనిపించట్లేదు. ఇరవైయేండ్లు ఉంటే హీరోయిన్, కాస్త వయసు పెరిగితే మదర్..మరి 30–40 మధ్యలో ఉన్న వాళ్ల పరిస్థితి ఏంటి? ఈ ఏజ్ గ్రూప్ని మంచి క్యారెక్టర్స్లో చూపించొచ్చుగా అనిపిస్తుంటుంది. త్వరలోనే ఈ ట్రెండ్ మారుతుంది అనుకుంటున్నా.
ఆ యాడ్ చాలా స్పెషల్
‘బాహుబలి’ సినిమా కంటే ముందే నాకు పెండ్లి అయింది. మా ఆయన రఘువంశీ నండూరి. ఆయన నా సపోర్ట్ సిస్టమ్. పెండ్లికి ముందే తనకి నేను సినిమాల్లోకి వెళ్లాలనుకుంటున్నా అని క్లియర్గా చెప్పా. ఆయన వెంటనే సినిమా హిట్ అయితే ‘ఇద్దరం కలిసి సెలబ్రేట్ చేసుకుందాం’ అన్నారు. నా దగ్గరికి ఏ సినిమా వచ్చినా తనతోనే ఫస్ట్ డిస్కస్ చేస్తా. నా యాక్టింగ్కి మొదటి క్రిటిక్ కూడా తనే. పోయిన ఏడాది బాబు పుట్టాడు. వాడి రాకతో నా లైఫ్ పూర్తిగా మారిపోయింది. మదర్హుడ్ని బాగా ఎంజాయ్ చేస్తున్నా. అయితే ఒక బిడ్డకి తల్లయ్యాక ఫిజికల్గా బాడీలో చాలా మార్పులు వస్తాయి. వాటిని ఓవర్ కమ్ చేయడానికి ప్రయత్నిస్తున్నా. అలాగే సీనియర్ యాక్టర్స్ అమితాబ్బచ్చన్, ప్రభు, శివ రాజ్కుమార్ , నాగార్జున గారితో చేసిన జువెలరీ యాడ్ నాకెప్పటికీ మెమరబుల్. ’
అలాంటి క్యారెక్టర్స్ చేయాలనుంది
డాన్స్ నాకు చిన్నప్పట్నించీ అలవాటైన ప్రపంచం. యాక్టింగ్ ఈ మధ్య అలవాటైన ప్రపంచం. ఈ రెండింటికి కొత్త, పాత అన్న ఒక్క ఫ్యాక్టర్ తప్పించి తేడాం ఏం లేదు. రెండూ ఇంపార్టెంట్ నాకు. అందుకే యాక్టింగ్లో బిజీ అయినా డాన్స్ని వదల్లేదు. ‘సద్యోణి’ అనే డాన్స్ అకాడమీ నడుపుతున్నా. పిల్లలకి డాన్స్ నేర్పిస్తూ నా ఇన్నేండ్ల ప్రాక్టీస్ని రివైజ్ చేసుకుంటున్నా. అలాగే ప్రస్తుతం భరతనాట్యంలో ఎమ్ఫిల్ చేస్తున్నా. ఫ్యూచర్లో పీహెచ్డీ చేయాలనుకుంటున్నా. జయసుధగారిలా డిఫరెంట్ క్యారెక్టర్స్ చేయాలన్నది
నా డ్రీమ్. ప్రస్తుతం స్మితామాధవ్తో కలిసి భరత నాట్యంలో అడుగులేస్తున్నా.
- ఆవుల యమున
