కోరుట్ల, వెలుగు: ప్రభుత్వ నిబంధనల మేరకు ఇందిరమ్మ ఇండ్లు నిర్మించుకోవాలని జగిత్యాల కలెక్టర్ సత్యప్రసాద్ లబ్ధిదారులకు సూచించారు. శనివారం కోరుట్ల మండలం మోహన్రావుపేట గ్రామంలోని రైతు వేదికలో లబ్ధిదారులకు ఇందిరమ్మ ఇండ్ల మంజూరు పత్రాలను పంపిణీ చేశారు. ఈ సందర్భంగా ఆయన మాట్లాడుతూ ఎంపిక సమయంలో ఫొటో దిగిన స్థలంలోనే లబ్ధిదారులు ఇండ్లు కట్టుకోవాలని, వేరే స్థలంలో నిర్మిస్తే బిల్లులు రావన్నారు. నిబంధనల ప్రకారం 400 నుంచి 600 స్క్వైర్ ఫీట్లలోనే విస్తీర్ణంలోనే నిర్మించుకోవాలన్నారు. ఆయన వెంట ఆర్డీవో జివాకర్రెడ్డి, హౌసింగ్ పీడీ ప్రసాద్, తహసీల్దార్ కృష్ణ చైతన్య, ఎంపీడీవో రామకృష్ణ , ఎంపీవో కృపాకర్, ఆర్ఐ రాజేందర్‌‌‌‌‌‌‌‌‌‌‌‌‌‌‌‌రావు, తదితరులు పాల్గొన్నారు.
భూ సమస్యలు పరిష్కరించాలి
జగిత్యాల టౌన్, వెలుగు: భూ భారతి రెవెన్యూ సదస్సుల్లో అన్ని రకాల సమస్యలని పరిష్కరించాలని కలెక్టర్ సత్యప్రసాద్ అధికారులను ఆదేశించారు. శనివారం కలెక్టరేట్ లో భూ భారతిపై రెవెన్యూ అధికారులతో రివ్యూ మీటింగ్‌ నిర్వహించారు. ఈ సందర్భంగా కలెక్టర్ మాట్లాడుతూ అన్ని మండలాల్లో ఊరూరా జరిగే సమావేశానికి ముందే రెండు రోజులు గ్రామాల్లో ప్రచారం చేసి, దరఖాస్తు ఫారంలను అందుబాటులో ఉంచాలని చెప్పారు. తహసీల్దార్ , నాయబ్ తహసీల్దారు రెండు టీంలుగా ఏర్పడి ఎప్పటికపుడు భూసమస్యలపై విచారణ చేయాలన్నారు. సమావేశంలో అడిషనల్ కలెక్టర్ లత, ఆర్డీవోలు, తహసీల్దార్లు, ఇతర అధికారులు పాల్గొన్నారు.
