సంగారెడ్డి టౌన్, వెలుగు: జిల్లాలో భూభారతి పైలెట్ ప్రాజెక్టుగా ఎంపికైన కొండాపూర్ మండలంలోని ప్రతీ గ్రామంలో రెవెన్యూ సదస్సులు నిర్వహించి భూ సమస్యలను శాశ్వత పరిష్కారం చూపాలని కలెక్టర్ క్రాంతి సూచించారు. శనివారం సంగారెడ్డి కలెక్టరేట్ నుంచి వీడియో కాన్ఫరెన్స్ ద్వారా అధికారులకు దిశా నిర్దేశం చేశారు. ఈ సందర్భంగా కలెక్టర్ మాట్లాడుతూ.. కొండాపూర్ మండలంలో ఈ నెల 5 నుంచి 19 వరకు 23 గ్రామాల్లో రెవెన్యూ సదస్సులు పకడ్బందీగా నిర్వహించాలన్నారు.
అధికారుల సమన్వయంతో పని చేయాలని సూచించారు. హెల్ప్డెస్క్లు ఏర్పాటు చేసి ప్రజల నుంచి వచ్చే దరఖాస్తులను క్షుణ్ణంగా పరిశీలించి సమస్యను పరిష్కరించాలని ఆదేశించారు. ప్రజలకు ఎలాంటి ఇబ్బందులు కలగకుండా టెంట్, తాగునీరు, సైన్ బోర్డులు, ఫ్లెక్సీలు ఏర్పాటు చేయాలన్నారు. వీడియో కాన్ఫరెన్స్లో అడిషనల్కలెక్టర్ మాధురి, అధికారులు పద్మజారాణి, రవీందర్ రెడ్డి, అశోక్, రెవెన్యూ సిబ్బంది పాల్గొన్నారు.
అభ్యర్థులు సకాలంలో పరీక్షా కేంద్రాలకు చేరుకోవాలి
ఆదివారం జరిగే నీట్ పరీక్షకు హాజరయ్యే అభ్యర్థులు సకాలంలో సెంటర్కు చేరుకోవాలని కలెక్టర్ క్రాంతి సూచించారు. జిల్లాలో 3,320 మంది పరీక్షకు హాజరు కానున్నట్లు తెలిపారు. జిల్లా వ్యాప్తంగా 7 పరీక్షా కేంద్రాలు ఏర్పాటు చేసినట్లు పేర్కొన్నారు. ప్రతీ పరీక్షా కేంద్రానికి ఒక నోడల్ అధికారిని నియమించామని అభ్యర్థులను ఉదయం 11 గంటల నుంచి మధ్యాహ్నం 1:30 వరకు అనుమతిస్తారన్నారు. నిర్ణీత సమయం దాటిన తర్వాత పరీక్షా కేంద్రంలోకి వెళ్లేందుకు అనుమతి ఉండదన్నారు. సెంటర్ల వద్ద పటిష్ట పోలీసు బందోబస్తు ఉంటుందని వెల్లడించారు.
