‘తెలంగాణ రైజింగ్’ సమిట్కు రండి.. ప్రధాని మోదీ, రాహుల్ను ఆహ్వానించనున్న సీఎం రేవంత్

కేంద్ర మంత్రులకూ ఇన్విటేషన్
అన్ని రాష్ట్రాల సీఎంలు హాజరయ్యేలా ప్రణాళికలు
ఒక్కో రాష్ట్రానికి వెళ్లి ఆహ్వానించనున్న మంత్రులు

హైదరాబాద్/న్యూఢిల్లీ, వెలుగు: సీఎం రేవంత్ రెడ్డి, డిప్యూటీ సీఎం భట్టి విక్రమార్క బుధవారం (డిసెంబర్ 4) ప్రధాని మోదీ, కాంగ్రెస్ నేత రాహుల్​తో భేటీ కానున్నారు. తెలంగాణ రైజింగ్ 2047 గ్లోబల్ సమిట్​కు అటెండ్ కావాల్సిందిగా ఆహ్వానించనున్నారు. ఉదయం 11 గంటలకు ప్రధానితో భేటీ అయ్యే అవకాశం ఉన్నది. డిసెంబర్  8, 9వ తేదీల్లో నిర్వహించనున్న రైజింగ్ వేడుకల్లో పాలుపంచుకోవల్సిందిగా కేంద్ర మంత్రులనూ కోరనున్నారు. 

మంగళవారం రాత్రి రేవంత్, భట్టి బేగంపేట ఎయిర్​పోర్ట్ నుంచి ప్రత్యేక విమానంలో బయల్దేరి ఢిల్లీకి చేరుకున్నారు. తర్వాత నేరుగా ఖర్గే నివాసానికి వెళ్లారు. తెలంగాణ రైజింగ్‌‌‌‌‌‌‌‌‌‌ గ్లోబల్‌‌‌‌ సమిట్–2025కు హాజరు కావాలని ఆహ్వానించారు. ఇందుకు సంబంధించిన ఇన్విటేషన్​ను డిప్యూటీ సీఎంతో కలిసి రేవంత్​ అందజేశారు. అనంతరం గ్లోబల్ సమిట్​కు సంబంధించిన వివరాలను ఖర్గేకు సీఎం స్వయంగా వివరించారు. కాగా, అన్ని రాష్ట్రాల సీఎంలనూ ప్రత్యేకంగా ఆహ్వానించాలని రేవంత్ రెడ్డి నిర్ణయించారు. 

మంత్రులే స్వయంగా వెళ్లి సీఎంలను కలిసి ఈ సదస్సుకు ఆహ్వానిస్తారు. ఎవరెవరు ఏ.. ఏ రాష్ట్రాలకు వెళ్లాలో సీఎం నిర్ణయించారు. 4న మంత్రులు ఆయా రాష్ట్రాలకు వెళ్లి గ్లోబల్ సమిట్ ఇన్విటేషన్ లెటర్లు అందజేస్తారు. జమ్మూ కశ్మీర్, గుజరాత్​కు ఉత్తమ్, పంజాబ్, హర్యానాకు దామోదర రాజనర్సింహ, ఏపీకి వెంకట్ రెడ్డి, కర్నాటక, తమిళనాడుకు శ్రీధర్ బాబు, యూపీకి పొంగులేటి, రాజస్థాన్ కు పొన్నం, చత్తీస్​గఢ్​కు కొండా సురేఖ, వెస్ట్ బెంగాల్ కు సీతక్క, మధ్యప్రదేశ్ కు తుమ్మల, అస్సాంకు జూపల్లి కృష్ణా రావు, బిహార్​కు వివేక్, ఒడిశాకు వాకిటి శ్రీహరి, హిమాచల్ ప్రదేశ్ కు అడ్లూరి లక్ష్మణ్ కుమార్, మహారాష్ట్రకు అజారుద్దీన్​ వెళ్లి సీఎంలను కలిసి ఆహ్వానిస్తారు. ఢిల్లీ సీఎం, కేంద్ర మంత్రులను ఎంపీలు కలిసి 
ఇన్విటేషన్​ అందజేస్తారు.