వయనాడ్: కేరళలో ఓటర్ల జాబితా ప్రత్యేక సవరణ (సర్)ను కాంగ్రెస్ వ్యతిరేకిస్తుందని ఆ పార్టీ అగ్రనేత ప్రియాంక గాంధీ తెలిపారు. పార్లమెంటు లోపల, బయట దీనిపై పోరాటం చేసినట్టుగానే ఇక్కడా వ్యతిరేకిస్తామని చెప్పారు. ప్రియాంక గాంధీ ప్రస్తుతం తన సొంత నియోజకవర్గం వయనాడ్లో పర్యటిస్తున్నారు. ఈ సందర్భంగా మీడియాతో మాట్లాడారు. ‘‘కేరళతో సహా అనేక రాష్ట్రాల్లో ఓటరు జాబితాల ప్రత్యేక సవరణ చేపట్టాని ఈసీ ప్లాన్ చేసింది.
దీనిని మేం తీవ్రంగా వ్యతిరేకిస్తాం. బిహార్లో ఈసీ చర్యలకు వ్యతిరేకంగా మేం పార్లమెంటు లోపల, బయట పోరాడాం. అదే విధంగా అన్ని ప్రాంతాల్లో సర్కు వ్యతిరేకంగా పోరాడుతాం. ఎన్నికల్లో మోసానికి అవకాశం ఉన్న మార్గం ఇదే. బిహార్లో సర్ ప్రక్రియ ప్రజాస్వామ్యాన్ని తీవ్రంగా దెబ్బతీసింది. ప్రతి రాష్ట్రంలోనూ అలాగే చేయడానికి ప్రయత్నిస్తే అది ప్రజాస్వామ్యానికి చేటు. అందుకే దానికి వ్యతిరేకంగా పోరాడాలి’’ అని ప్రియాంక పేర్కొన్నారు.
