న్యూఢిల్లీ: వర్షాల కారణంగా ఆగస్టు నెల మొదటి 15 రోజులలో పెట్రోల్, డీజిల్ వినియోగం తగ్గినట్లు డేటా చెబుతోంది. కిందటి నెలతో, అంతకు ముందు ఏడాది ఆగస్టు నెల మొదటి 15 రోజులతో పోల్చినా వాటి వినియోగం తగ్గినట్లు పేర్కొంది. పెట్రోల్, డీజిల్ డిమాండ్ తగ్గడం వరసగా ఇది రెండో నెల. రుతుపవనాల టైములో వాటి డిమాండ్ తగ్గడం సాధారణమైనదే. ఆగస్టు 1–15 మధ్య కాలంలో డీజిల్ డిమాండ్ 5.7 శాతం తగ్గి 2.67 మిలియన్ టన్నులకు చేరింది. జులై నెల మొదటి 15 రోజులలో వినియోగం 15 శాతం పడిపోయినా, ఆ తర్వాత 15 రోజులలో కొంత పుంజుకుంది.
రుతుపవనాల వల్ల వ్యవసాయ రంగంలో డీజిల్ వినియోగం తగ్గిపోతుంది. దాంతో డిమాండ్ కూడా పడిపోతుంది. ఈ ఏడాది ఏప్రిల్, మే నెలల్లో వ్యవసాయ రంగం కారణంగా డీజిల్ డిమాండ్ వరసగా 6.70 శాతం, 9.3 శాతం ఎగసింది. ఏసీల వినియోగం కూడా వేసవిలో ఎక్కువైంది. అది కూడా డిమాండ్ పెరగడానికి మరో కారణంగా నిలిచింది.
మరోవైపు పెట్రోల్ అమ్మకాలు సైతం ఆగస్టు మొదటి 15 రోజులలో 8 శాతం తగ్గి 1.19 మిలియన్ టన్నులకు చేరాయి. జులై నెలలో పెట్రోల్ వినియోగం 10.5 శాతం తగ్గింది. ఎకానమీ నిలకడగా ఎదుగుల సాధిస్తున్న నేపథ్యంలో రాబోయే నెలల్లో పెట్రోల్, డీజిల్ డిమాండ్ ఊపందుకుంటుందని ఎనలిస్టులు చెబుతున్నారు.
