హైదరాబాద్, వెలుగు: నెల రోజులకుపైగా లాక్డౌన్లో చిక్కుకుపోయి ఇప్పుడు సొంత రాష్ట్రాలకు వెళ్లాలనుకునే వారికి అన్ని టెస్టులు చేసి జాగ్రత్తగా పంపాలని రాష్ట్ర ప్రభుత్వం అధికారులను ఆదేశించింది. తెలంగాణ నుంచి ఇతర రాష్ట్రాలకు వెళ్లే వారి విషయంలో తీసుకోవాల్సిన జాగ్రత్తలపై గైడ్లైన్స్ రిలీజ్ చేసింది. ఈ మేరకు సీఎస్ సోమేశ్ కుమార్ ఉత్తర్వులు జారీ చేశారు. ఇతర రాష్ట్రాలకు వెళ్లే వారికి రెవెన్యూ, మెడికల్, పోలీసు అధికారులతో కూడిన జాయింట్ టీమ్ ఇంటర్ స్టేట్ బార్డర్కు 2 లేదా 3 కిలోమీటర్ల ముందు కరోనా టెస్టులు చేయాలని సూచించింది. స్క్రీనింగ్ చేసే టీమ్లు 24 గంటలపాటు పనిచేయాలని, టెస్టుల సమయంలో 5 నిమిషాల కంటే ఎక్కవ సేపు జనం నిలబడకుండా చర్యలు తీసుకోవాలని స్పష్టం చేసింది. స్క్రీనింగ్లో కరోనా లక్షణాలు లేనట్టు తేలితే వారికి ప్రభుత్వం సూచించిన ఫార్మాట్ లో మెడికల్ సర్టిఫికెట్ జారీ చేయాలని పేర్కొంది. వేరే రాష్ట్రాలకు పోతున్న వారి పేర్లు, ఫోన్ నంబర్లతోపాటు వాళ్లు వెళ్తున్న వెహికల్స్కు పర్మిట్ ఇవ్వాలంది. ఆ వెహికల్లో ఎంత మంది వెళుతున్నారు, ఎక్కడికి వెళుతున్నారన్న వివరాలు స్పష్టం చేయాలని పేర్కొంది. వెహికల్ ప ర్మిట్పై జిల్లా కలెక్టర్ సంతకం, స్టాంప్, జిల్లా కలెక్టర్ కంట్రోల్ రూం ఫోన్ నంబర్, తేదీ ఉండాలని సూచించింది. ఇక మెడికల్ సర్టిఫికెట్లో వ్యక్తులు, ఫోన్ నంబర్లతోపాటు జిల్లా మెడికల్ అధికారి (డీఎంహెచ్ వో) పేరు, సంతకం, స్టాంప్, జిల్లా కంట్రోల్ రూం ఫోన్ నంబర్లు ఉండాలని స్పష్టం చేసింది. ఈ గైడ్ లైన్స్ ను తప్పకుండా పాటించాలని కలెక్టర్లు, ఎస్పీలు, పోలీస్ కమిషనర్లను ఆదేశించింది.
