గోదావరిఖని, వెలుగు: సింగరేణిలో ఆదానీ, అంబానీల రూపంలో దొంగలు పడ్డారని సీపీఐ రాష్ట్ర కార్యదర్శి, సింగరేణి కాలరీస్ వర్కర్స్ యూనియన్ ఏఐటీయూసీ గౌరవ అధ్యక్షుడు, కొత్తగూడెం ఎమ్మెల్యే కూనంనేని సాంబశివరావు ఆందోళన వ్యక్తం చేశారు. యూనియన్ఉప ప్రధాన కార్యదర్శి మడ్డి ఎల్లా గౌడ్ అధ్యక్షతన శుక్రవారం రాత్రి పెద్దపల్లి జిల్లా గోదావరిఖని జీఎం ఆఫీస్ గ్రౌండ్లో జరిగిన సింగరేణి కార్మికుల కవాతు కార్యక్రమానికి ఆయన చీఫ్గెస్ట్గా హాజరై మాట్లాడారు. గత బీఆర్ఎస్ ప్రభుత్వ హయాంలో పార్లమెంటులో ప్రవేశపెట్టిన ఎంఎండీఆర్ చట్టం వల్ల సింగరేణికి కొత్త గనులు రాకుండా పోయాయన్నారు. దీనికి అనుకూలంగా పార్లమెంట్లో బీఆర్ఎస్ ఎంపీ కవిత తదితరులు ఓటు వేశారని గుర్తుచేశారు.
అలాంటి సంఘానికి నేడు కార్మికుల గురించి, ఏఐటియుసి గురించి మాట్లాడే అర్హత లేదని ఘాటుగా విమర్శించారు. కార్మికుల హక్కుల సాధన కోసం 31 డిమాండ్లతో సమ్మె నోటీసు ఇచ్చామని, దీనిపై ఈ నెల 28 న చర్చలు జరుగనున్నాయని చెప్పారు. ఒక వేళ చర్చలు విఫలమైతే ఆగస్టు 15 తర్వాత ఎప్పుడైనా సమ్మెలోకి వెళ్తామని, ఈ సమ్మె ను విజయవంతం చేయడానికి కార్మిక వర్గం సిద్ధంగా ఉండాలని పిలుపునిచ్చారు. కార్యక్రమంలో యూనియన్ అధ్యక్ష, కార్యదర్శులు వాసిరెడ్డి సీతారామయ్య, కొరిమి రాజ్ కుమార్, లీడర్లు వై.వీ.రావు, వీరభద్రం, కవ్వంపల్లి స్వామి, కె.రాజారత్నం, జె.రాంచందర్, గంధం సాంబశివరావు తదితరులు పాల్గొన్నారు.
