రాముడి పేరుతో ఉపాధి హామీ కూలీలా పొట్టకొట్టేందుకు కేంద్ర ప్రభుత్వం కుట్రను చేస్తుందని సీపీఎం రాష్ట్ర కార్యదర్శి జాన్ వెస్లీ ఆరోపించారు. ఉపాధి హామీ పథకానికి మహాత్మా గాంధీ పేరును తొలగించడాన్ని ఆయన ఖండించారు. గురువారం ( డిసెంబర్ 18) హైదరాబాద్ లోని ఆర్టీసీ క్రాస్ రోడ్ లో నూతన ఉపాధి హామీ చట్టాన్ని వ్యతిరేకిస్తూ , బిల్లు ప్రతులను సీపీఎం నేతలు తగులబెట్టారు.
ఈ సందర్భంగా జాన్ వెస్లీ మాట్లాడుతూ... ఉపాధి హామీ చట్టాన్ని నిరుగార్చే ప్రయత్నం చేస్తున్నారని విమర్శించారు. గతంలో ఉన్న పనిదినాలు పెంచుతూనే.. ఈ పథకానికి నిధుల కోత పెట్టడం దుర్మార్గం అన్నారు. గతంలో 90 శాతం నిధులను కేంద్ర ప్రభుత్వంఇచ్చేది.. కొత్త బిల్లు ప్రకారం.. 60 శాతం నిధులను మాత్రమే ఈ పథకానికి ఇవ్వనుందన్నారు. నిధులను తగ్గించి ఉపాధి హామీ కూలీ ల పొట్ట కొట్టేందుకు కేంద్ర ప్రభుత్వం కుట్ర చేస్తోందన్నారు. ఈ బిల్లు చట్టం అయితే కూలీలను పనులు దొరకడం కష్టమవుతుందన్నారు.
కేంద్ర ప్రభుత్వం తక్షణమే ఈ చట్టాన్ని ఉపసంహరించుకొని , పాత పద్ధతిలోనే కొనసాగించాలని డిమాండ్ చేశారు. ఈ నెల 20న అన్ని మండల , పట్టణ ప్రాంతాలలో సిపిఎం ఆధ్వర్యంలో ఆందోళనలు చేపడతామని జాన్ వెస్లీ హెచ్చరించారు.
