హైదరాబాద్, వెలుగు: రాష్ట్రంలోని అడవుల సంరక్షణలో భాగంగా ఇరిగేషన్ భూముల్లో కూడా తోటల పెంపకాన్ని చేపట్టినట్లు సీఎస్శాంతికుమారి తెలిపారు. బీఆర్కేఆర్ భవన్లో ఇరిగేషన్ భూముల్లో ప్లాంటేషన్ అంశంపై బుధవారం వర్క్ షాప్ నిర్వహించారు. ఈ వర్క్ షాప్నకు జోగులాంబ గద్వాల్, నిజామాబాద్, మహబూబ్నగర్, మెదక్, నాగర్కర్నూల్, రాజన్న సిరిసిల్ల, సిద్దిపేట, సూర్యాపేట జిల్లాల అదనపు కలెక్టర్లు, జిల్లా అటవీ అధికారులు, ఇరిగేషన్ అధికారులు హాజరయ్యారు. ఈ సందర్భంగా సీఎస్ మాట్లాడుతూ..హరితహారం స్కీముతో రాష్ట్రంలోని అడవులను పునరుద్ధరించడమే కాకుండా.. వాటిని స్మగ్లింగ్, ఆక్రమణలు, అగ్నిప్రమాదం నుంచి కూడా కాపాడుతున్నామని తెలిపారు.
రాష్ట్రంలో పచ్చదనం గతంలో కంటే 7.7 శాతం పెరిగిందని ఆమె వెల్లడించారు. సీఎం ఆదేశాల మేరకు గతేడాది నుంచి ఇరిగేషన్ భూముల్లో తోటల పెంపకం చేపట్టినట్లు తెలిపారు. బ్లాక్ ప్లాంటేషన్తో గ్రామాలకు ఆదాయం సమకూరేలా ప్రణాళికలు చేపట్టాలని ఆధికారులను ఆదేశించారు. సమావేశంలో స్పెషల్ సీఎస్ రజత్కుమార్, పంచాయతీ రాజ్ ముఖ్య కార్యదర్శి సందీప్ కుమార్ సుల్తానియా, పీసీసీఎఫ్ ఆర్ఎం డోబ్రియాల్ తదితరులు పాల్గొన్నారు.
