నందమూరి బాలకృష్ణ అంటేనే మాస్ యాక్షన్.. పవర్‌ఫుల్ డైలాగ్స్.. అదిరిపోయే ఎనర్జీ. ఇక ఆయన డ్యాన్స్ ఫ్లోర్‌లోకి దిగితే అభిమానులకు పూనకాలే! ఇప్పుడు అలాంటి మాస్ జోష్‌కు బాలీవుడ్ బ్యూటీ నర్గీస్ ఫక్రీ కలర్‌ఫుల్ గ్రేస్ తోడైంది. బాలయ్య, గోపీచంద్ మలినేని కాంబినేషన్‌లో వస్తున్న ‘దాదా’ మూవీ నుంచి ఫస్ట్ సింగిల్ ‘దాదా ధమాకా’ విడుదలైంది. తమన్ తనదైన స్టైల్‌లో కంపోజ్ చేసిన ఈ పాట మాస్ మ్యూజిక్ లవర్స్‌ను ఆకట్టుకునేలా ఉంది. ముఖ్యంగా బాలయ్య స్వయంగా గొంతు కలపడం, నర్గీస్ ఫక్రీతో కలిసి ఆయన చేసిన డ్యాన్స్ ఈ పాటకు ప్రత్యేక ఆకర్షణగా నిలిచాయి.
బాలయ్య వాయిస్.. తమన్ మ్యూజిక్..
‘దాదా ధమాకా’ పాటకు తమన్ అదిరిపోయే మాస్ బీట్స్ అందించారు. రామజోగయ్య శాస్త్రి అందించిన లిరిక్స్ పాటకు మరింత జోష్ తీసుకొచ్చాయి. ఈ పాటలో బాలకృష్ణ, శ్రీపూర్ణిమ తమ గాత్రంతో అలరించారు. మరో విశేషం ఏంటంటే.. బాలయ్య కేవలం తెరపైనే కాదు, తన గొంతుతోనూ ఈ పాటలో సందడి చేశారు. దాదాపు తొమ్మిదేళ్ల విరామం తర్వాత మరోసారి ఆయన సింగర్‌గా మారి కొన్ని లైన్స్ ఆలపించడం అభిమానులకు స్పెషల్ సర్‌ప్రైజ్‌గా మారింది. గతంలో ‘పైసా వసూల్’ సినిమాలో ‘మామా ఏక్ పెగ్ లా’ పాటతో అలరించిన బాలయ్య.. ఇప్పుడు ‘దాదా ధమాకా’తో మరోసారి తన గాత్రాన్ని వినిపించారు.
బాలయ్య స్టెప్పులు.. నర్గీస్ ఫక్రీ అందాల సందడి!
ఈ పాటలో అసలైన స్పెషల్ అట్రాక్షన్ బాలయ్య, నర్గీస్ ఫక్రీ జోడీ. తనదైన మాస్ స్వాగ్‌తో బాలకృష్ణ డ్యాన్స్ చేస్తుంటే.. బాలీవుడ్ బ్యూటీ నర్గీస్ ఫక్రీ తన కలర్‌ఫుల్ లుక్స్, గ్రేస్‌ఫుల్ మూవ్స్‌తో పాటకు గ్లామర్ అద్దారు. ఇద్దరి కాంబినేషన్‌లో వచ్చే డ్యాన్స్ మూమెంట్స్ పాటకు మంచి విజువల్ అప్పీల్ తీసుకొచ్చాయి. ముఖ్యంగా నర్గీస్ ఫక్రీ గ్లామర్, బాలయ్య ఎనర్జీ కలవడంతో ఈ సాంగ్‌పై ప్రేక్షకుల్లో ఆసక్తి పెరిగింది. మాస్ బీట్‌కు తగ్గట్టుగా బాలయ్య స్టైల్, నర్గీస్ ఫక్రీ స్క్రీన్ ప్రెజెన్స్ పాటకు హైలైట్‌గా నిలిచాయి.
‘వీర సింహారెడ్డి’ తర్వాత మరోసారి..
‘వీర సింహారెడ్డి’ వంటి మాస్ హిట్ తర్వాత బాలకృష్ణ, దర్శకుడు గోపీచంద్ మలినేని కలిసి చేస్తున్న రెండో సినిమా ఇది. ‘దాదా’ అనే పవర్‌ఫుల్ టైటిల్‌తో తెరకెక్కుతున్న ఈ చిత్రాన్ని వృద్ధి సినిమాస్ బ్యానర్‌పై వెంకట సతీష్ కిలారు నిర్మిస్తున్నారు. ఈ సినిమాలో మంచు మనోజ్, కాజల్ అగర్వాల్ కీలక పాత్రల్లో నటిస్తున్నారు. ఇప్పటికే విడుదలైన సినిమా గ్లింప్స్ బాలయ్య గ్యాంగ్‌స్టర్ లుక్‌తో అంచనాలను పెంచగా.. ఇప్పుడు ఫస్ట్ సింగిల్‌తో మ్యూజికల్ ప్రమోషన్స్ కూడా ఊపందుకున్నాయి.
భారీ సాంకేతిక బృందం.. క్రిస్మస్‌కు థియేటర్లలోకి ‘దాదా’!
ఈ చిత్రానికి తమన్ సంగీతం అందిస్తుండగా, అరవింద్ ఎస్. కశ్యప్ సినిమాటోగ్రఫీ బాధ్యతలు నిర్వర్తిస్తున్నారు. ఏఎస్ ప్రకాష్ ప్రొడక్షన్ డిజైనర్‌గా, నవీన్ నూలి ఎడిటర్‌గా వ్యవహరిస్తున్నారు. సాయి మాధవ్ బుర్రా డైలాగ్స్ అందిస్తున్నారు. రామ్-లక్ష్మణ్, రవివర్మ, వి. వెంకట్ యాక్షన్ సీక్వెన్స్‌లను రూపొందిస్తున్నారు.
ఇక ఈ చిత్రాన్ని క్రిస్మస్ కానుకగా డిసెంబర్ 24న ప్రపంచవ్యాప్తంగా విడుదల చేసేందుకు మేకర్స్ సిద్ధమవుతున్నారు. ఫస్ట్ సింగిల్‌తోనే మాస్ వైబ్స్ క్రియేట్ చేసిన బాలయ్య.. వెండితెరపై ఎలాంటి ధమాకా చూపిస్తారో చూడాలి. మొత్తానికి ‘దాదా ధమాకా’తో బాలయ్య అభిమానులకు మ్యూజికల్ ట్రీట్ ఇచ్చారు మేకర్స్!
