లేడీ కండక్టర్లకు డార్క్‌‌ బ్లూ కలర్‌‌ యాప్రాన్‌‌ ..?

హైదరాబాద్‌‌, వెలుగు : ఆర్టీసీలో లేడీ కండక్టర్లకు ఇంతకుముందు ఇవ్వాలనుకున్న మెరూన్​ కలర్ ​యాప్రాన్‌‌కు బదులు డార్క్‌‌ బ్లూ కలర్‌‌ యాప్రాన్‌‌ ఇవ్వాలని నిర్ణయించినట్లు సమాచారం. డిసెంబర్​ ఒకటో తేదీన సీఎం కేసీఆర్​ ప్రగతి భవన్‌‌లో కార్మికులతో సమావేశం నిర్వహించారు. ఆ సందర్భంగా ఖాకి కలర్‌‌ డ్రెస్‌‌ కోడ్‌‌ మార్చుకోవాలని సూచించారు. ఆర్టీసీ అధికారి సుధ నేతృత్వంలో ఓ కమిటీ కూడా వేశారు. ప్రతి డిపో నుంచి ఇద్దరు లేడీ కండక్టర్లను కమిటీలో చేర్చుకుని అభిప్రాయాలు తీసుకున్నారు. చివరికి చీర కాకుండా మెరూన్‌‌ కలర్‌‌ యాప్రాన్‌‌ వేసుకోవాలని నిర్ణయించారు. ఇక ఉత్తర్వులు రావడం ఒక్కటే మిగిలి ఉండగా ఆ కలర్‌‌పై భిన్నాభిప్రాయాలు వ్యక్తమయ్యాయి. మెరూన్​చూడటానికి బాగుండనదే వాదనలు వినిపించాయి. దీంతో కమిటీ ఇటీవల మరోసారి సమావేశమై చర్చించింది. చివరగా డార్క్‌‌బ్లూ అయితే బాగుంటుందని అభిప్రాయపడినట్లు తెలిసింది. ఇదే ఫైనల్‌‌ చేయనున్నట్లు సమాచారం. లేడీ కండక్టర్లకు మొత్తం 9వేల మీటర్ల క్లాత్​అవసరం పడనుండగా, రెండు యాప్రాన్లతో పాటు లేసుల్లేని షూ జత ఇవ్వనున్నారు. త్వరలో హైదరాబాద్‌‌లో జరగనున్న ఆర్టీసీ వనభోజనాల కార్యక్రమంలో డార్క్​ బ్లూ యాప్రాన్‌‌ను ప్రదర్శించనున్నారు.

‘గ్రేటర్‌‌’ కండక్టర్లు, డ్రైవర్లకు బదిలీ చాన్స్!

గ్రేటర్‌‌ హైదరాబాద్‌‌ జోన్‌‌ కండక్టర్లు, డ్రైవర్లకు బదిలీ అవకాశాన్ని ఆర్టీసీ కల్పించనుంది. సిటీలో వెయ్యి బస్సుల్ని రద్దు చేసిన నేపథ్యంలో సుమారు 4 వేల మంది డ్రైవర్లు, కండక్టర్లు ఖాళీగా ఉన్నట్టు అంచనా. ఈ సిబ్బందిని గ్రామీణ ప్రాంతాలకు బదిలీ చేసుకునే అవకాశాన్ని ఆర్టీసీ కల్పిస్తోంది. ఉద్యోగం కోసం గ్రామీణ ప్రాంతాల నుంచి వచ్చి హైదరాబాద్‌‌లోని డిపోల్లో డ్యూటీ చేస్తున్న వారికి ఈ చాన్స్​ ఇవ్వాలని యోచిస్తున్నారు. ఈ మేరకు ఆసక్తి ఉన్న వారు డిపో మేనేజర్లకు దరఖాస్తు పెట్టుకోవాలని మేనేజ్​మెంట్​ సూచించింది. ఆ దరఖాస్తులను పరిశీలించాక నిర్ణయం ప్రకటిస్తామని ఆర్టీసీ పేర్కొంది. ఈ మేరకు డిపో మేనేజర్లకు ఆదేశాలు జారీ చేసింది.