మహబూబ్నగర్, వెలుగు : యాసంగి వడ్లను కేంద్రమే కొనాలంటూ రాష్ట్ర వ్యాప్తంగా పంచాయతీలు సహా అన్ని లోకల్బాడీస్లో రెండు, మూడు రోజులుగా తీర్మానాలు చేస్తున్నారు. ఇటీవల మంత్రుల ఢిల్లీ టూర్లోనే కేంద్రం తన వైఖరి చెప్పిన నేపథ్యంలో లోకల్బాడీస్ తీర్మానాలతో ఎలాంటి లాభం లేదని టీఆర్ఎస్ మంత్రులు, ఎమ్మెల్యేలు అభిప్రాయానికి వచ్చారు. ఒక దశలో క్యాన్సిల్ చేద్దామనుకున్నప్పటికీ సీఎం కేసీఆర్ ఆదేశాలు కనుక ఆయనను అడిగే ధైర్యం చేయలేక మానుకున్నారు. ఈ క్రమంలో తీర్మానాల కోసం రాష్ట్రవ్యాప్తంగా అఫీషియల్గానే రూ.5 కోట్ల జనరల్ ఫండ్స్ ఖర్చు చేస్తున్నారు.
రా రైస్ తీసుకుంటామన్న కేంద్రం..
రాష్ట్రం నుంచి యాసంగి వడ్లను రా రైస్గా ఇస్తే తీసుకుంటామని కేంద్రం చెబుతుండగా, బాయిల్డ్ రైస్ తీసుకోవాలని మొన్నటి దాకా రాష్ట్ర సర్కారు డిమాండ్ చేసింది. కానీ గతంలో బాయిల్డ్ రైస్ ఇవ్వబోమని అగ్రిమెంట్ చేసుకోవడంతో తెలంగాణ ప్రభుత్వం ఇరకాటంలో పడింది. పైగా బాయిల్డ్ రైస్మిల్లర్ల ప్రయోజనం కోసమే ప్రభుత్వ పెద్దలు కేంద్రాన్ని ఇరుకునపెడ్తున్నారనే విమర్శలు కూడా వచ్చాయి. దీంతో ఉన్నట్టుండి మాటమార్చారు. కేంద్రం రైస్ కాకుండా నేరుగా వడ్లే కొనాలని డిమాండ్ చేస్తున్నారు. ఈ క్రమంలో కేంద్రంపై ఒత్తిడి తెచ్చేందుకని ఇటీవల రాష్ట్ర మంత్రులు ఢిల్లీకి వెళ్లగా కేంద్రం తన వైఖరి స్పష్టంగా చెప్పింది. బాయిల్డ్ రైస్ ఎవరూ తినడం లేదని, అందువల్ల దేశమంతా తీసుకున్నట్లే తెలంగాణ నుంచి కూడా రా రైస్ తీసుకుంటామని కేంద్ర మంత్రి పియూష్ గోయల్ స్పష్టం చేశారు. దీంతో తెలంగాణ మంత్రులు ఏమీ చేయలేక తిరిగివచ్చారు. మంత్రుల టూర్కు ముందే వారం రోజుల కింద మంత్రులు, ఎమ్మెల్యేలు, జడ్పీ చైర్మన్లతో సీఎం కేసీఆర్ హైదరాబాద్లో ఇదే అంశంపై మీటింగ్ పెట్టారు. వడ్ల కొనుగోలు విషయంలో కేంద్రంపై ఒత్తిడి పెంచేందుకు రాష్ట్రవ్యాప్తంగా అన్ని గ్రామ పంచాయతీలు, మండల, జిల్లా పరిషత్లు, మున్సిపాలిటీలు, మార్కెట్కమిటీలు, పీఏసీఎస్లలో పాలకవర్గాల మీటింగులు నిర్వహించి, తీర్మానాలు చేసి కేంద్రానికి పంపించాలని ఆదేశించారు.
తీర్మానాలకు రూ.5కోట్ల ఖర్చు..
నిజానికి రాష్ర్టంలోని అన్ని జిల్లాల్లో నెల, రెండు నెలల కిందే జిల్లా పరిషత్, మండల పరిషత్, మున్సిపల్ సమావేశాలు ముగిశాయి. మళ్లీ 90 రోజుల తర్వాత వాటిని నిర్వహించాలి. కానీ కేవలం సీఎం సార్ చెప్పిండని రెండు రోజులుగా గ్రామ సభలు, మండల పరిషత్, జిల్లా పరిషత్, కార్పొరేషన్, మున్సిపాలిటీలు, ప్రాథమిక సహకార సంఘాలు, వ్యవసాయ మార్కెట్ కమిటీల సమావేశాలు నిర్వహిస్తున్నారు. ఇప్పటికే కొన్ని జిల్లాలో రెండు రోజుల నుంచి ఈ సమావేశాలు ప్రారంభం కాగా, మిగతా జిల్లాల్లో సోమ, మంగళవారాల్లో నిర్వహించేందుకు ఏర్పాట్లు పూర్తయ్యాయి. ఇందు కోసం రాష్ర్ట వ్యాప్తంగా రూ.5 కోట్ల జనరల్ ఫండ్స్ను కేవలం తీర్మానాల కోసం ఖర్చు చేస్తున్నారు. రాష్ర్టంలో 12 వేల గ్రామ పంచాయతీలు ఉండగా, ఒక్కో గ్రామ పంచాయతీ సభ నిర్వహణ కోసం రూ.2వేల చొప్పున 12 వేల గ్రామ పంచాయతీల్లోనే రూ.2.40 కోట్లు ఖర్చు చేస్తున్నారు. 538 మండల పరిషత్లకు రూ.10 వేల చొప్పున, 814 పీఏసీఎస్ల్లో రూ.8 వేల చొప్పున, 45 మార్కెట్ కమిటీల్లో రూ.5 వేల చొప్పున, 141 మున్సిపాలిటీల్లో రూ.10 వేలచొప్పున, 33 జడ్పీ సమావేశాల్లో రూ.1.50 లక్షలు చొప్పున..ఇలా ఏం తక్కువ రూ.5 కోట్ల జనరల్ ఫండ్స్ ఖర్చు చేస్తుండడం గమనార్హం.
