బరువు తగ్గడానికి పాటించే డైట్ల వల్ల కొన్నిరకాల విటమిన్లు శరీరానికి అందవు. వాటిలో విటమిన్ బి–12 ఒకటి. విటమిన్–డి లెక్కనే అన్ని వయసు వాళ్లలో ముఖ్యంగా టీనేజర్స్లో ఈ విటమిన్ లోపం ఎక్కువగా కనిపిస్తోంది అంటోంది జనరల్ ఫిజీషియన్ సంజల్ నగర్కర్.
ఎర్ర రక్తకణాల తయారీకి విటమిన్ బి–12 చాలా అవసరం. ఈ విటమిన్ తక్కువైతే రక్తహీనత వస్తుంది. ఇన్ఫ్లమేషన్, అలసటతో పాటు జ్ఞాపకశక్తికి సంబంధించిన సమస్యలు కూడా మొదలవుతాయి. ఇవేకాకుండా నడిచేటప్పుడు ఇబ్బంది, తిమ్మిర్లు పట్టడం, ఆకలి తగ్గిపోవడం, వాంతి చేసుకోవడం, డయేరియాతో పాటు మానసిక ఒత్తిడి వంటి లక్షణాలు కనిపిస్తాయి. కొన్నిసార్లు నాడీసంబంధిత సమస్యలు వచ్చే అవకాశం ఉంది. అందుకని ఈ లక్షణాలు కనిపిస్తే డాక్టర్ని కలిసి, విటమిన్ బి–12 కోసం ఏమేం తినాలో తెలుసుకోవాలి. ఇవి తినాలి. పాల పదార్థాలు, బాదం, సాల్మన్ చేపలు, చికెన్, గుడ్లు, పుట్టగొడుగుల్లో విటమిన్ బి–12 ఉంటుంది. సప్లిమెంట్స్ తీసుకున్నా కూడా విటమిన్ బి–12 లోపం ఏర్పడకుండా చూసుకోవచ్చు.
