డయాబెటిస్ను వైద్య పరిభాషలో డయాబెటిస్ మెలిటస్ అంటారు. ఇది మెటబాలిక్ డిసీజ్. దీన్ని సరిగ్గా మేనేజ్ చేయకపోతే ఆరోగ్య సమస్యలు ఇబ్బంది పెడతాయి. శరీరం బ్లడ్ షుగర్ను వాడుకోవడం మీద దీని ప్రభావం ఉంటుంది.శరీరంలోని కండరాలు, త్వచాల్లో ఉండే కణాలకు ప్రధాన ఎనర్జీ సోర్స్ గ్లూకోజ్. అలాగే బ్రెయిన్కి మెయిన్ ఇంధనం కూడా ఇదే.
డయాబెటిస్లో టైప్1, టైప్2, జెస్టేషనల్, ప్రి–డయాబెటిస్ అని రకాలు ఉంటాయి. అది ఏ రకం అయినా కూడా రక్తంలో చక్కెర మోతాదులో మాత్రం తేడా వస్తుంది. రక్తంలో చక్కెర ఎక్కువగా ఉండడం వల్ల రకరకాల ఆరోగ్య సమస్యలు వస్తాయి. దీర్ఘకాలిక డయాబెటిక్ కండిషన్లలో టైప్1, టైప్2 డయాబెటిస్ ఉంటాయి.
అయితే డయాబెటిస్ను రివర్స్ చేయడం అనేది మాత్రం ప్రి–డయాబెటిస్, జెస్టేషనల్ డయాబెటిస్లో వీలవుతుంది. ప్రి–డయాబెటిస్లో రక్తంలో చక్కెర స్థాయిలు సాధారణం కంటే ఎక్కువగా ఉంటాయి. అంతేకానీ డయాబెటిస్ బారిన పడ్డారని చెప్పే స్థాయిలో బ్లడ్ షుగర్ లెవల్స్ ఉండవు. ప్రి–డయాబెటిస్ ఉంటే అది డయాబెటిస్కు దారి తీసే అవకాశం ఉందనే ముందస్తు హెచ్చరిక ఇది. ఇలాంటప్పుడు సరైన జాగ్రత్తలు తీసుకుంటే ఏ సమస్యా ఉండదు. ప్రెగ్నెంట్గా ఉన్నప్పుడు కొందరిలో జెస్టేషనల్ డయాబెటిస్ వస్తుంది. ప్రసవం అయ్యాక ఇది చాలామందిలో పోతుంది. రక్తంలో చక్కెర ఎంత ఎక్కువగా ఉందనే దాన్ని బట్టి డయాబెటిస్ లక్షణాలు ఉంటాయి. కొందరిలో ప్రత్యేకించి ప్రి, జెస్టేషనల్ డయాబెటిస్ లేదా టైప్2 డయాబెటిస్ ఉన్న వాళ్లలో లక్షణాలు కనిపించవు. టైప్1 డయాబెటిస్లో అయితే లక్షణాలు వెంటనే కనిపిస్తాయి.