- బీసీ వైపు భువనగిరి ఎమ్మెల్యే మొగ్గు
- తమకే ఇవ్వాలంటూ ఓసీ లీడర్ల ఒత్తిడి
యాదాద్రి, వెలుగు: యాదాద్రి జిల్లా వలిగొండ మార్కెట్ కమిటీ చైర్మన్ ఎంపిక వివాదం బీఆర్ఎస్లో బీసీలు వర్సెస్ ఓసీలుగా మారింది. పార్టీ రెండు వర్గాలుగా చీలిపోయింది. భువనగిరి ఎమ్మెల్యే పైళ్ల శేఖర్రెడ్డి బీసీల వైపు నిలబడగా, ఓసీలకే ఇవ్వాలని ఆ వర్గం లీడర్లు పట్టుబడుతున్నట్లు తెలుస్తోంది. గతంలో వలిగొండ మార్కెట్ కమిటీ చైర్మన్పదవి జనరల్మహిళగా ఉండటంతో బీసీ సామాజికవర్గానికి చెందిన కోనపురి కవితను ఎంపిక చేశారు. కాగా ఈసారి జనరల్గా మారింది. భువనగిరి నియోజకవర్గంలో రెండు మార్కెట్లు ఉండగా భువనగిరిలో జనరల్ కేటగిరిలో ఎడ్ల రాజేందర్రెడ్డికి చైర్మన్గా అవకాశమిచ్చారు. ఈ నేపథ్యంలో జనరల్ కేటగిరిలోనే ఉన్న వలిగొండ మార్కెట్ చైర్మన్బీసీలకు ఇవ్వాలనే విషయం తెరపైకి రావడంతో ఎంపికలో జాప్యం జరుగుతోంది. గతంలో జనరల్మహిళ అయినప్పటికీ బీసీ మహిళకు అవకాశమిచ్చారని, ఇప్పుడూ తమకు సపోర్టు చేయడంలేదని ఓసీలు ముఖ్యంగా రెడ్డి సామాజికవర్గం ఎమ్మెల్యే పైళ్ల శేఖర్రెడ్డిపై గుర్రుగా ఉంది. కాగా చైర్మన్ పదవి కోసం బీసీ సామాజిక వర్గానికి చెందిన మొగుళ్ల శ్రీను, పైళ్ల రాజవర్ధనరెడ్డి, రమేశ్రెడ్డి పోటీ పడుతున్నారు. మొగుళ్ల శ్రీనువైపు ఎమ్మెల్యే మొగ్గు చూపుతున్నట్లు చర్చ నడుస్తోంది.
రెడ్డి నేతల భేటీ
ఎమ్మెల్యే శేఖర్రెడ్డి నిర్ణయాన్ని వ్యతిరేకిస్తూ వలిగొండకు చెందిన రెడ్డి లీడర్లు ఒక్కటయ్యారు. జనరల్ కేటగిరిలో బీసీలను చైర్మన్గా ఎంపిక చేయడమేంటన్న ప్రశ్నలు సంధిస్తున్నారు. రెడ్డిల్లో ఎవరికి చైర్మన్ పదవి ఇవ్వాలని ఆ సామాజిక వర్గానికి చెందిన సర్పంచులు, ఇతర ప్రజా ప్రతినిధులు పైళ్ల శేఖర్రెడ్డిని కలిశారు. గతంలో జనరల్ మహిళ అయినప్పటికీ బీసీ మహిళకు అవకాశమిచ్చిన విషయాన్ని రెడ్డి లీడర్లు గుర్తు చేశారు. ఈసారి రెడ్డిలకే చైర్మన్ పదవి ఇవ్వాలని కోరారు. అయితే ఎమ్మెల్యే మాత్రం తాను బీసీ సామాజిక వర్గానికి చెందిన లీడర్కు మార్కెట్ చైర్మన్ పదవి ఇస్తానని మాట ఇచ్చానని, తప్పే ప్రసక్తే లేదని తేల్చి చెప్పినట్టు తెలిసింది. ఈ క్రమంలో రెడ్డి సామాజిక వర్గానికి చెందిన బీఆర్ఎస్ లీడర్లు, ప్రజా ప్రతినిధులు ఇటీవల భువనగిరిలోని ఓ హోటల్లో సమావేశమయ్యారు. విషయాన్ని మం త్రి కేటీఆర్ దృష్టికి తీసుకెళ్లాలని భావించి ఆయన అపాయింట్మెంట్ కోసం ప్రయత్నించి విఫలమైనట్టు తెలిసింది. ఇదిలా ఉండగా అసెంబ్లీ ఎన్నికలు దగ్గర పడుతున్న సమ యంలో బీసీ, ఓసీలుగా పార్టీ కేడర్చీలిపోవడంపై బీఆర్ఎస్లీడర్లు ఆందోళన చెందుతున్నారు.
