- రాష్ట్రంలో ప్రచారం చేయాలని పార్టీ శ్రేణులకు పిలుపు
- ఐదు నియోజకవర్గాల్లో తమిళ ఓటర్ల ప్రభావం
హైదరాబాద్, వెలుగు: తెలంగాణ ఎన్నికల్లో కాంగ్రెస్పార్టీకి తమిళనాడు అధికార పార్టీ డీఎంకే సంపూర్ణ మద్దతు ప్రకటించింది. ఇండియా కూటమిలోని కాంగ్రెస్అభ్యర్థుల కోసం ప్రచారం నిర్వహిస్తామని తెలిపింది. తమిళనాడు ముఖ్యమంత్రి, డీఎంకే అధినేత స్టాలిన్ఆదేశాలతో కాంగ్రెస్ కు మద్దతు ఇస్తున్నట్టు మంగళవారం ప్రకటన విడుదల చేసింది. ‘‘తెలంగాణలోని డీఎంకే పార్టీ శ్రేణులు, అన్ని విభాగాల నేతలు కాంగ్రెస్కు మద్దతుగా నిలవాలి. ఆ పార్టీ గెలుపు కోసం కృషి చేయాలి. ఇందుకోసం ఎలక్షన్ వర్కింగ్ కమిటీని ఏర్పాటు చేయాలి. భారీ మెజారిటీతో కాంగ్రెస్ అభ్యర్థులు గెలిచేలా ప్రచారం నిర్వహించాలి’’ అని అందులో పేర్కొంది. కాగా, తమకు మద్దతు ఇచ్చినందుకు డీఎంకేకు కాంగ్రెస్కృతజ్ఞతలు తెలిపింది.
నాలుగైదు సీట్లలో తమిళుల ప్రభావం..
రాష్ట్రంలోని నాలుగైదు నియోజకవర్గాల్లో తమిళుల ప్రభావం ఎక్కువగా ఉంది. హైదరాబాద్ లోనే నాలుగు నియోజకవర్గాల్లో తమిళ ఓటర్లు గెలుపోటములను ప్రభావితం చేసే స్థాయిలో ఉన్నారు. సికింద్రాబాద్, కంటోన్మెంట్, మల్కాజిగిరి, మేడ్చల్లలో చెప్పుకోదగిన స్థాయిలో తమిళ సెటిలర్లు ఉన్నారు. రామగుండం నియోజకవర్గంలోనూ తమిళ ప్రజలు నివసిస్తున్నారు. అక్కడ కేంద్ర ప్రభుత్వ పరిశ్రమలు ఉండడంతో చాలామంది వచ్చి సెటిల్ అయ్యారు. ఈ ఐదు నియోజకవర్గాల్లో దాదాపు సగం మంది దాకా తమిళ ఓటర్లు ఉంటారని అంచనా. ఇక సికింద్రాబాద్, కంటోన్మెంట్ లో భారీగా తమిళ ఓటర్లు ఉన్నారు. ఇప్పుడు డీఎంకే పిలుపుతో అక్కడి తమిళులు కాంగ్రెస్వైపే మొగ్గుచూపే అవకాశాలు ఉన్నట్టు రాజకీయ వర్గాల్లో చర్చ జరుగుతున్నది.
ప్రచారానికి స్టాలిన్?
కాంగ్రెస్కు డీఎంకే మద్దతు తెలిపిన నేపథ్యంలో ఆ పార్టీ కార్యకర్తలు తెలంగాణలోని పలు నియోజకవర్గాల్లో ప్రచారం చేయనున్నారు. అంతేకాకుండా తమిళనాడు నుంచి డీఎంకే కీలక నేతలనూ ఇక్కడికి రప్పించే ప్రయత్నాలు జరుగుతున్నట్టు తెలుస్తున్నది. తమిళుల ప్రభావం ఉన్న నియోజకవర్గాల్లో స్టాలిన్, ఉదయనిధి స్టాలిన్వంటి వారితో ప్రచారం చేయిస్తే కాంగ్రెస్కు కలిసి వస్తుందనే అభిప్రాయం పార్టీ వర్గాల్లో వ్యక్తమవుతున్నది.
