‘చైనా తయారీ’ మనకొద్దు
యాప్లు, వస్తువులు కొనొద్దు
టిక్ టాక్ తో రూ. కోట్లు ఇస్తున్నం
ఆ డబ్బుతోనే చైనా సైన్యానికి ఆయుధాలు
వాలెట్తో కూడా ఫైట్ చేయొచ్చు
మెగసెసె అవార్డు విన్నర్ సోనమ్ వాంగ్చుక్
న్యూఢిల్లీ: ‘బోర్డర్లో మన సైనికులపైకి ఎక్కుపెట్టేందుకు చైనా సైనికులకు మనమే ఆయుధాలను కొనిస్తున్నం.. చైనా వస్తువులు కొంటూ, టిక్ టాక్ వంటి యాప్లు వాడుతూ చైనాకు వందల కోట్ల రూపాయలు ఆర్జించిపెడ్తున్నం.. వీటి ద్వారా వచ్చిన డబ్బులతోనే చైనా ఆయుధాలను కొని, తన సైనికులకు ఇచ్చి బోర్డర్కు పంపుతోంది. అందుకే మేడ్ ఇన్ చైనా వస్తువులను బ్యాన్ చేయండి’ అంటూ ఇన్నోవేటర్, మెగసెసె అవార్డు గ్రహీత సోనమ్ వాంగ్చుక్ పిలుపునిచ్చారు. ఈమేరకు ఆయన లడఖ్లో ఓ వీడియో తీసి సోషల్ మీడియాలో పెట్టడంతో ఇప్పుడది వైరల్గా మారింది. ఇందులో వాంగ్చుక్ మాట్లాడుతూ.. చైనాపై బుల్లెట్తోనే కాదు వాలెట్తోనూ యుద్ధం చేయొచ్చని చెప్పారు. చైనాలో తయారైన తన మొబైల్ ఫోన్ను వారం రోజుల్లో, వచ్చే ఏడాదిలోగా మేడిన్ చైనా వస్తువులను అన్నింటినీ వదిలించుకుంటానని వాంగ్చుక్ వివరించారు. జాతీయ గీతం వినబడితే సినిమా హాల్లో కూడా లేచి నిలబడే సంస్కారం కేవలం మన దేశ ప్రజల్లో మాత్రమే చూశానని ఆయన వివరించారు. ఇప్పుడు మన దేశభక్తిని నిరూపించుకునే టైమొచ్చిందని, బాధ్యత గల పౌరులుగా ప్రతి ఒక్కరూ చైనా వస్తువులను బ్యాన్ చేయాలని ఆయన కోరారు. ‘ మేడ్ ఇన్ చైనా వస్తువులను మీరు వదుల్చుకోవడంతో పాటు మరో వంద మందికి చెప్పండి’ అని విజ్ఞప్తి చేశారు. బోర్డర్లో చైనాను మన సైనికులు ఎదుర్కొంటరు.. వాళ్ల డ్యూటీ వాళ్లు చేస్తరు, మీ వంతుగా మీరు కూడా చైనాపై ఫైనాన్షియల్గా ఫైట్ చేయాలని చెప్పారు. దేశంలోని వివిధ సిటీల్లో ఉన్న మనమంతా సైనికులకు మద్ధతుగా చైనాపై వాలెట్తో పోరాడాలని వాంగ్చుక్ కోరారు. దేశంలోని 130 కోట్ల మంది జనమంతా చైనా వస్తువులను కొనడం మానేస్తే, దీనిని ఓ ఉద్యమంగా చేస్తే… అది ప్రపంచంలోని ఇతర దేశాలకూ పాకుతుందని అన్నారు. దీనివల్ల మన దేశంలోని పరిశ్రమలు నిలదొక్కుకుంటాయని, మన కార్మికులు బాగుపడతారని వాంగ్చుక్ తెలిపారు.
For More News..
