- ఐదుగురు అరెస్ట్, రిమాండ్కు తరలింపు
జీడిమెట్ల, వెలుగు: తనకు బాకీ ఉన్న డబ్బులు ఇవ్వలేదన్న కక్షతో బాధితుడి వాహనాన్ని దొంగలించిన ఘటన దుండిగల్ పోలీస్ స్టేషన్ పరిధిలో జరిగింది. నారాయణపేటకు చెందిన మహేశ్, నర్సింహ దూరపు బంధువులు. నర్సింహ వద్ద మహేశ్ రూ. 2 లక్షలు అప్పు తీసుకుని తిరిగి ఇవ్వకుండా కొత్తగా బొలెరో వాహనం కొనుగోలు చేశాడు.
దీంతో ఆగ్రహించిన నర్సింహ.. తన స్నేహితులతో కలిసి ఆ వాహనాన్ని దొంగలించాలని పథకం వేశాడు. ఈ క్రమంలో ఈ నెల 23న స్క్రాప్ అమ్ముతామని చెప్పి మహేశ్ ను ఓఆర్ఆర్ మల్లంపేట్ వద్దకు పిలిపించారు. అనంతరం బెదిరించి బొలెరో వాహనాన్ని లాక్కొని పరారయ్యారు.
బాధితుడి ఫిర్యాదుతో రంగంలోకి దిగిన పోలీసులు.. నర్సింహ, కార్తిక్, విఘ్నేశ్, సాయి, పాశ్వాన్ను గురువారం అరెస్ట్ చేశారు. బొలెరో వాహనంతోపాటు ఒక స్కూటీని స్వాధీనం చేసుకున్నారు.
