అహ్మదాబాద్ జమల్పూర్లోని వాల్డ్ సిటీలో ‘రోటీ లేన్’ అనే గల్లీ ఒకటి ఉంది. అక్కడ ఏ గుమ్మం ముందు చూసినా.. ఆడవాళ్లు చకచకా రోటీలు చేస్తూ, కాలుస్తూ కనిపిస్తారు. అది కూడా వందల నుంచి వేల సంఖ్యలో. ఎన్నో ఏండ్లుగా అదే వాళ్లకి జీవనోపాధి. అందుకే ఈ ప్రాంతాన్ని ‘రోటీ లేన్’ అని పిలుస్తున్నారు.
అహ్మదాబాద్లో ఉన్న చాలా హోటళ్లు, రెస్టారెంట్లు రోటీ లేన్కు రెగ్యులర్ కస్టమర్లు. అలాగే చుట్టుపక్కల ఏ వేడుక జరిగినా రోటీలకి ఆర్డర్లు ఇక్కడికే వస్తాయి. ఇలాంటి పెద్ద ఆర్డర్స్ లేనప్పుడు రోడ్ల పక్కన రోటీలు పెట్టుకుని అమ్ముతుంటారు. ఇలా ఒక్కో కుటుంబం రోజుకు ఐదు వందల రోటీలు అమ్ముతుంటుంది. ‘‘ఆ ఆదాయంతోనే మా పిల్లల్ని చదివిస్తున్నాం. కుటుంబాన్ని పోషించుకుంటున్నాం’’ అని చెప్తున్నారు వీళ్లు. ఈ గల్లీలో 35 ఏండ్ల నుంచి రోటీలు అమ్ముతున్న కుటుంబాలు కూడా ఉన్నాయి. ‘ ఈ బిజినెస్ ఆలోచన ఎలా వచ్చిందని’ అడిగితే... ఈ గల్లీలో ఉండే ఆడవాళ్లు ఇంటి ముందు స్టవ్ పెట్టి రోటీలు కాల్చేవాళ్లట. అటుగా వచ్చి పోయేవాళ్లంతా.. అది చూసి, ‘అమ్ముతారా’? అని అడిగేవాళ్లట. అలా మొదట ఒకరిద్దరితో మొదలైన వ్యాపారం తర్వాత గల్లీ అంతటికీ బతుకుదెరువు అయింది.