దసరా సెలవులను కుదిస్తారన్న వార్తలపై విద్యాశాఖ క్లారిటీ ఇచ్చింది. సెలవులు తగ్గించే ఆలోచన లేదని స్పష్టం చేసింది. ముందుగా ప్రకటించిన షెడ్యూల్ ప్రకారం ప్రైమరీ, అప్పర్ ప్రైమరీ, హైస్కూళ్లకు సెప్టెంబర్ 26 నుంచి అక్టోబర్ 9 వరకు మొత్తం 14 రోజులు సెలవులుంటాయని చెప్పింది. విద్యార్థులు, ఉపాధ్యాయులు, తల్లిదండ్రులు ఆందోళన చెందాల్సిన అవసరం లేదని పాఠశాల విద్యాశాఖ అధికారులు చెప్పారు.
ఆగస్టులో కురిసిన వర్షాలు, జాతీయ సమైక్యతా దినోత్సవం కారణంగా విద్యాసంస్థలకు 5 రోజులు సెలవులు ప్రకటించిందని, అందుకు గాను పాఠశాలలకు సెలవులను14 నుంచి 9 రోజులకు కుదించాలని ఎస్ఈఆర్టీ, విద్యాశాఖకు లేఖ రాసింది. ఆ సెలవులను భర్తీ చేసుకునేందుకు ఈ నెల 30 వరకు రాష్ట్రంలో పాఠశాలలు పని చేసే విధంగా నిర్ణయం తీసుకోవాలని కోరింది. ఈ నేపథ్యంలో దసరా సెలవులను కుదిస్తారన్న ఊహాగానాలు మొదలయ్యాయి. ఈ నేపథ్యంలో పాఠశాల విద్యాశాఖ స్పష్టత ఇస్తూ ప్రకటన జారీ చేసింది.
