జనగామ అర్బన్, వెలుగు: గ్రామ పంచాయతీ ఎన్నికలు ప్రజాస్వామ్య బద్ధంగా జరిగేలా ప్రత్యేక శ్రద్ధతో పనిచేయాలని ఎన్నికల సాధారణ పరిశీలకులు నిఖిల నోడల్ అధికారులకు సూచించారు. జీపీ ఎన్నికలకు సంబంధించి జిల్లాకి జనరల్ అబ్జర్వర్గా నిఖిల నియామకమైన నేపథ్యంలో గురువారం కలెక్టరేట్ లో అధికారులతో సమావేశం నిర్వహించారు. ఈ సందర్భంగా ఆమె మాట్లాడుతూ జీపీ ఎన్నికలు సజావుగా నిర్వహించాలన్నారు. ముందుగా జిల్లా ఎన్నికల అధికారి, కలెక్టర్ రిజ్వాన్ భాషా షేక్ జిల్లాలో మూడు విడతలుగా జరగనున్న ఎన్నికల ఏర్పాట్ల గురించి ఎన్నికల నిర్వహణ కి పూర్తి ఏర్పాట్లు చేశామని తెలిపారు.
అనంతరం అబ్జర్వర్ మాట్లాడుతూ ఎన్నికలకు సంబంధించి ప్రతి అంశం మీద అధికారులు శిక్షణ తీసుకొని పూర్తి అవగాహన కలిగి ఉండాలన్నారు. ఆ తర్వాత లింగాల ఘనపురం గ్రామ పంచాయతీని కలెక్టర్ తో సందర్శించి నామినేషన్ ప్రక్రియ ను పరిశీలించారు. కలెక్టరేట్లో మీడియా సెంటర్ ను అబ్జర్వర్ నిఖిల ప్రారంభించారు. కార్యక్రమంలో అడిషనల్కలెక్టర్ పింకేశ్కుమార్, జడ్పీసీఈవో మాధురి షా, వ్యయ పరిశీలకులు జయశ్రీ, డీఆర్డీవో వసంత, డీపీవో నవీన్, డీపీఆర్వో పల్లవి, ఈడీఎం గౌతమ్ తదితరులు పాల్గొన్నారు.
