‘ఫోర్బ్స్’ అత్యంత ధనవంతుల జాబితాలో నెంబర్ 1 స్థానాన్ని అపర కుబేరుడు, ట్విట్టర్ అధినేత ఎలాన్ మస్క్ కోల్పోయారు. నెంబర్ 1 ధనవంతుడి స్థానాన్ని ఫ్రాన్స్ కు చెందిన లగ్జరీ ఉత్పత్తుల కంపెనీ LVMH కు సీఈవోగా వ్యవహరిస్తున్న బెర్నార్డ్ అర్నాల్ట్ కైవసం చేసుకున్నారు. దీంతో మస్క్ రెండో స్థానానికి పరిమితమయ్యారు. ఇక ఇండియాకు చెందిన వ్యాపార దిగ్గజం గౌతమ్ అదానీ 134.6 బిలియన్ డాలర్ల సంపదతో ఈ జాబితాలో మూడోస్థానంలో నిలిచారు. ఈకామర్స్ దిగ్గజం అమెజాన్ వ్యవస్థాపకుడు జెఫ్ బెజోస్ 113.8 బిలియన్ డాలర్ల నికర సంపదతో నాలుగో స్థానం పొందారు. ఈ జాబితాలో రిలయన్స్ అధినేత ముకేశ్ అంబానీ 92.8 బిలియన్ డాలర్ల నికర సంపదతో 8వ స్థానంలో నిలిచారు.
మస్క్ నంబర్ 1 స్థానాన్ని ఎందుకు కోల్పోయాడంటే..
మస్క్ నంబర్ 1 స్థానాన్ని కోల్పోవడానికి పలు ముఖ్యమైన కారణాలు ఉన్నాయి. 44 బిలియన్ డాలర్లతో ట్విట్టర్ ను కొనుగోలు చేసే డీల్ ను మస్క్ కుదుర్చుకున్న సమయంలోనే.. అమెరికా ఫెడరల్ రిజర్వ్ కొన్ని కఠినమైన ఆర్థిక విధానానాలను ప్రకటించింది. ఇది కూడా మస్క్ పాలిట ప్రతికూలంగా పరిణమించింది. అంతేకాదు ఈ డీల్ కోసం నిధులను సమకూర్చుకునేందుకు మస్క్ తన ఎలక్ట్రిక్ కార్ల కంపెనీ టెస్లాలోని కొన్ని షేర్లను అమ్ముకున్నారు. దీంతో 2022 సంవత్సరంలో ఇప్పటివరకు టెస్లా కంపెనీ షేరు విలువ దాదాపు 50 శాతానికిపైగా తగ్గిపోయింది. ఫలితంగా దాదాపు 168 బిలియన్ డాలర్ల మస్క్ సంపద ఆవిరైందని న్యూయార్క్ లోని బ్లూమ్ బర్గ్ బిలియనీర్స్ ఇండెక్స్ వెల్లడించింది.
అంతకుముందు రెండేళ్ల పాటు..
అంతకుముందు రెండేళ్ల పాటు అమెరికా స్టాక్ మార్కెట్లో టెస్లా కంపెనీ షేరు హవా కొనసాగింది. దీంతో రెండేళ్ల క్రితం ఒకానొక దశలో మస్క్ నికర సంపద విలువ దాదాపు 340 బిలియన్ డాలర్లకు చేరింది. కానీ బంగారు బాతు లాంటి టెస్లా కంపెనీ షేర్లను అమ్ముకోవాలని మస్క్ తీసుకున్న నిర్ణయం ఆయన సంపదను అమాంతం తగ్గించేసింది. దీంతో నికర సంపద విలువ కాస్తా 340 బిలియన్ డాలర్ల నుంచి 181.3 బిలియన్ డాలర్లకు డౌన్ అయిపోయింది. ఇక ఇదే వ్యవధిలో ఫ్రాన్స్ కు చెందిన లగ్జరీ ఉత్పత్తుల కంపెనీ LVMH కి సీఈవోగా వ్యవహరిస్తున్న బెర్నార్డ్ అర్నాల్ట్ సంపద విలువ 186.5 బిలియన్ డాలర్లు దాటింది. దీంతో ఫోర్బ్స్ అత్యంత ధనవంతుల జాబితాలో అర్నాల్ట్ కు మొదటి స్థానం దక్కింది.
