యాదాద్రి, వెలుగు: యాదాద్రి జిల్లా కాంగ్రెస్లో అసమ్మతి భగ్గుమంది. డీసీసీ ప్రెసిడెంట్ కుంభం అనిల్కుమార్రెడ్డికి వ్యతిరేకంగా సోమవారం రాత్రి అత్యవసరంగా మీటింగ్ ఏర్పాటు చేసుకొని ఆయనపై విమర్శలు గుప్పించారు. కుంభం వల్ల కాంగ్రెస్ నష్టపోతున్నదని ఆరోపించారు. వచ్చే ఎన్నికల్లో బీసీ సామాజిక వర్గానికి సంబంధించిన వారికి టికెట్ ఇచ్చే విధంగా అధిష్ఠానంపై ఒత్తిడి తేవాలని నిర్ణయం తీసుకున్నారు. భువనగిరి, బీబీనగర్, వలిగొండ, పోచంపల్లి మండలాలకు చెందిన పలువురు లీడర్లు మేడ్చల్ రంగారెడ్డి జిల్లా ఘట్కేసర్లో మీటింగ్ ఏర్పాటు చేసుకున్నారు. ఈ మీటింగ్లో పలువురు లీడర్లు మాట్లాడారు. మంత్రి హరీశ్రావుతో కుంభం చర్చలు జరుపుతున్నాడని, ఏ క్షణమైనా ఆయన కాంగ్రెస్ను వీడిపోతారని అభిప్రాయపడ్డారు. ఆయనకు బీ ఫారం ఇచ్చిన మరుక్షణమే.. బీఆర్ఎస్లోకి వెళ్లిపోతారని స్పష్టం చేశారు.
చర్చలు జరుపుతున్న విషయం టీపీసీసీకి సమాచారం ఉందని మీటింగ్లో వెల్లడించారు. కుంభం వెంట ఎవరూ లేరని, ఆయనకు బిజినెస్ తప్ప మరొకటి తెలియదంటూ చెప్పుకొచ్చారు. ఆయన దగ్గరకు వెళ్లి సలహా ఇచ్చినా పట్టించుకోరని కామెంట్ చేశారు.'ఆయన దగ్గరకు వెళ్తే పట్టించుకోరు. ఏదైనా విషయం చెప్పితే వినిపించుకోరు. కేసీఆర్ వద్దకు పోతే ఎలా కాళ్లు మొక్కుతారో..? కుంభం వద్దకు పోయినా ఆయన కాళ్లు, ఆయన భార్య కాళ్లు, చివరకు కూతురు కాళ్లు కూడా మొక్కాలి' అంటూ ఓ లీడర్ కామెంట్ చే శారు. రెడ్డి సామాజిక వర్గంలో కుంభం అనిల్కుమార్ రెడ్డికి సంబంధించిన 'మటాడి' ఓట్లు అతి తక్కువగా ఉన్నాయని, అదే బీఆర్ఎస్ ఎమ్మెల్యే పైళ్ల శేఖర్రెడ్డికి సంబంధించిన 'గుటాడి' ఓట్లు 25 వేలకు పైగా ఉన్నాయని చెప్పుకొచ్చారు. గత ఎన్నికల్లో కుంభం 25 వేల ఓట్ల తేడాతో ఓడిపోయిన విషయాన్ని గుర్తు చేస్తూ ఈసారి బీసీలకు టికెట్ ఇస్తే.. కాంగ్రెస్ గెలుపు ఖాయమన్నారు. ఈసారి బీసీలకు టికెట్ ఇప్పించుకోవడానికి అధిష్ఠానంపై ఒత్తిడి తేవాలని నిర్ణయం తీసుకున్నారు. మీటింగ్లో పోత్నక్ ప్రమోద్కుమార్, రామాంజనేయులు గౌడ్, అనంతరెడ్డి, కృష్ణారెడ్డి సహా పలువురు పాల్గొన్నారు.
