నిజామాబాద్ జిల్లాలో కల సాకారం .. టీయూలో ఇంజినీరింగ్ కాలేజీ ఏర్పాటుకు ఓకే

నిజామాబాద్, వెలుగు : నిజామాబాద్, కామారెడ్డి, నిర్మల్, అదిలాబాద్ జిల్లాల విద్యార్థుల కల సాకారమైంది. తెలంగాణ వర్సిటీలో ఇంజినీరింగ్ కాలేజీని మంజూరు చేస్తూ కాంగ్రెస్​ సర్కార్​ ఉత్తర్వులు జారీ చేయడంతో విద్యార్థులు సంబురాలు చేసుకుంటున్నారు. ఈ ఏడాది నాలుగు కోర్సులకు ప్రభుత్వం అనుమతి ఇచ్చింది.

 బీటెక్​ (సీఎస్​ఈ), బీటెక్ (సీఎస్​ఈ, ఏఐ), బీటెక్ (కంప్యూటర్ సైన్స్​), బీటెక్​ (డేటా సైన్స్​) బ్రాంచ్​లను అనుమతిస్తూ విద్యా శాఖ కార్యదర్శి యోగితారాణా గురువారం​ఉత్తర్వులు జారీ చేశారు. ఒక్కో బ్రాంచ్​లో 60 మంది చొప్పున 240 మంది విద్యార్థులకు అవకాశం లభించనుంది. ఆగస్టు 5 నుంచి అడ్మిషన్లు ప్రారంభం కానుండగా, మూడో విడత కౌన్సిలింగ్ ద్వారా సీట్లు భర్తీ చేయనున్నారు. 

నాలుగు జిల్లాలకు ప్రయోజనం..

టీయూకు మంజూరైన ప్రభుత్వ ఇంజినీరింగ్ కాలేజీతో నిజామాబాద్, కామారెడ్డి, నిర్మల్, అదిలాబాద్ జిల్లాల విద్యార్థులకు ప్రయోజనం చేకూరనుంది. ఈ జిల్లాల నుంచి ఏటా సుమారు 55 వేల మంది విద్యార్థులు ఇంటర్​ పూర్తి చేస్తున్నారు. ఇప్పటి దాకా సర్కార్ ఇంజినీరింగ్ కాలేజీ లేక హైదరాబాద్, కరీంనగర్ జిల్లాల ప్రైవేట్​ కాలేజీలను ఆశ్రయించి, ఫీజులు భరించలేక కొందరు మధ్యలోనే చదువు ఆపేస్తున్నారు. మంజూరైన ఇంజినీరింగ్ కాలేజీ లో ట్రెడిషనల్ కోర్సులు కాకుండా  డిమాండ్ ఉన్న కంప్యూటర్ కోర్సులకు అనుమతించడంతో అడ్మిషన్లకు పోటీ పెరగనుంది. 

ఖాళీగా ఉన్న సైన్స్ బిల్డింగ్​లో ఇంజినీరింగ్ కాలేజీ నిర్వహించనున్నట్లు వీసీ యాదగిరిరావు తెలిపారు. ఎంసీఏ బిల్డింగ్ కూడా సిద్ధంగా ఉందన్నారు. రూ.12 కోట్ల రూసా నిధులతో నిర్మిస్తున్న బిల్డింగ్​ను ఏడు నెలల్లో పూర్తి  చేసి బాయ్స్, గర్ల్స్ హాస్టల్స్ వచ్చే ఏడాదికి అందుబాటులో తేవాలని నిర్ణయించినట్లు వీసీ తెలిపారు. ఈ ఏడాది డే స్కాలర్ పద్ధతిలో కాలేజీని రన్​ చేయనున్నామని, అడ్మిషన్లు పూర్తయ్యాక 27 మంది కొత్త
ప్రొఫెసర్లను తీసుకోనున్నట్లు పేర్కొన్నారు. 

మాట నిలబెట్టుకున్న సర్కార్.. 

తెలంగాణ ఉద్యమ సమయం 2006లో నాటి కాంగ్రెస్​ ప్రభుత్వం వర్సిటీని ఏర్పాటు చేసింది. నిజామాబాద్ జిల్లా కేంద్రానికి 15 కిలోమీటర్ల దూరంలో హైదరాబాద్, నాగ్​పూర్​ నేషనల్​ హైవే పక్కన 577 ఎకరాల ల్యాండ్​లో  ఆరు కోర్సులతో వర్సిటీ ప్రారంభం కాగా, ప్రస్తుతం 31 కోర్సులు కొనసాగుతున్నాయి. ఆర్ట్స్​, సైన్స్​, కామర్స్, సోషల్​ సైన్స్, ఎల్ఎల్​బీ, ఎల్ఎల్ఎం, ఎంబీఏ, ఎంసీఏ తదితర కోర్సులు నడుస్తున్నాయి. వీటిలో బయోటెక్నాలజీ, మైక్రో బయాలజీ వంటి 12 సెల్ప్​ఫైనాన్స్​ కోర్సులు ఉన్నాయి. వర్సిటీ పరిధిలోని 81 పీజీ కాలేజీల్లో 5 వేల మంది, 320 డిగ్రీ కాలేజీల్లో సుమారు 50 వేల మంది విద్యార్థులు ఉంటారు. యూనివర్సిటీ క్యాంపస్​లో 2 వేల మంది చదువుతున్నారు. ఉస్మానియా, కాకతీయ వర్సిటీల తరువాత మూడో పెద్ద వర్సిటీగా యూజీసీ న్యాక్ ‘బీ’ గ్రేడ్ హోదా ఇచ్చింది. 

పదేండ్ల బీఆర్ఎస్​ పాలనలో  ప్రభుత్వ ఇంజినీరింగ్ కాలేజీ ఊసే ఎత్తలేదు.  సీఎం రేవంత్​రెడ్డి అసెంబ్లీ, పార్లమెంట్​ఎన్నికలప్పుడు కాలేజీ  ఏర్పాటు చేస్తామని హామీ ఇచ్చారు.  ఉన్నత విద్యా శాఖ ప్రిన్సిపల్ సెక్రటరీ బుర్ర వెంకటేశం ఫైల్ ప్రిపేర్​ చేశారు. జూలై 17న ఉన్నత ఎడ్యుకేషన్ కౌన్సిల్ చైర్మన్ బాలకృష్ణారెడ్డి వర్సిటీని విజిట్ చేసి ఇంజినీరింగ్ కాలేజీ మంజూరుపై సీఎం రేవంత్​రెడ్డికి రిపోర్టు ఇచ్చారు. అప్పటికే టీపీసీసీ ప్రెసిడెంట్ మహేశ్​కుమార్​గౌడ్​, జిల్లా ఎమ్మెల్యేలు భూపతిరెడ్డి, సుదర్శన్​రెడ్డి, ధన్​పాల్ సూర్యనారాయణ  వర్సిటీలో ఇంజినీరింగ్ కాలేజీ ఏర్పాటు చేయాలని కోరారు. దీంతో ప్రభుత్వం ఇచ్చిన హామీ నెరవేరుస్తూ కాలేజీని 
మంజూరు చేసింది.

విద్యకు ఫస్ట్​ ప్రయారిటీ

ఇచ్చిన మాటకు కట్టుబడి ఇంజినీరింగ్ కాలేజీ మంజూరు చేసినందుకు సీఎం రేవంత్​రెడ్డికి కృతజ్ఞతలు. కాంగ్రెస్​ ప్రభుత్వం విద్యకు ప్రయారిటీ ఇస్తుంది. గత పాలకులు విద్యార్థుల బలిదానాలు కోరుకుండ్రు. కాలేజీ కోసం షబ్బీర్​అలీ సహా జిల్లాలోని ఎమ్మెల్యేలంతా కృషి చేశారు. 

మహేష్​గౌడ్​, టీపీసీసీ ప్రెసిడెంట్​

బడుగు, బలహీనవర్గాలకు మేలు

బడుగు, బలహీన వర్గాల విద్యార్థులకు ఇంజినీరింగ్​ కాలేజీతో మేలు జరగనుంది.  ఉమ్మడి అదిలాబాద్, నిజామాబాద్ జిల్లాల్లో సర్కార్ ఇంజినీరింగ్​ కాలేజీ లేక ఇన్నాళ్లు పడిన బాధలు తొలిగినయ్​. అద్భుత రిజల్టు సాధించేలా కాలేజీ నడుపుతం.  

ప్రొఫెసర్ యాదగిరిరావు, వీసీ, టీయూ