హైదరాబాద్, వెలుగు: రైతుల ఆవిష్కరణలను పేటెంట్ హక్కుతో రక్షించాలని కొండా లక్ష్మణ్ హార్టికల్చర్ వర్సిటీ వీసీ దండా రాజిరెడ్డి అన్నారు. రైతు, సంస్థల ఆధారిత ఆవిష్కరణలకు రక్షణ అవసరమని, నెలకు ఒక పేటెంట్ దాఖలు చేయాలని వర్సిటీ లక్ష్యం పెట్టుకుందన్నారు.
శుక్రవారం (ఆగస్టు 01) హార్టికల్చర్ వర్సిటీ, ఐపీఆర్ ఆధ్వర్యంలో ‘ఉద్యాన రంగంలో ఆవిష్కరణలు: పేటెంట్ హక్కులు’ అనే జాతీయ వర్క్‌‌‌‌షాప్‌‌‌‌ను నిర్వహించారు. ఇందులో వీసీ మాట్లాడుతూ.. వర్సిటీ ఆధ్వర్యంలో బాలానగర్ సీతాఫలం, ఆర్మూర్ పసుపు భౌగోళిక గుర్తింపు (జీఐ) రిజిస్ట్రేషన్ ప్రక్రియ జరుగుతున్నట్లు తెలిపారు. పరిశోధకులు, విద్యార్థుల పేటెంట్- యోగ్యమైన ఆవిష్కరణలకు వర్సిటీ ఆర్థిక సహాయం అందిస్తుందన్నారు.
