కామారెడ్డి, వెలుగు : వడ్ల కొనుగోళ్లలో జాప్యాన్ని నిరసిస్తూ సోమవారం నిజాంసాగర్, బీబీపేట మండల కేంద్రాల్లో రైతులు రాస్తారోకో నిర్వహించారు. నిజాంసాగర్ మండలం మాగి కొనుగోలు సెంటర్ లో కాంటాలు పెట్టినప్పటికీ వడ్లను లోడింగ్ చేసి, మిల్లులకు తరలించడం లేదని ఆందోళనకు దిగారు. బస్తాకు మూడు కిలోలు అదనంగా తరుగు తీస్తున్నారని ఆరోపించారు. రైతుల వద్దకు తహసీల్దార్, ఎస్సై వెళ్లి మాట్లాడారు.
సజావుగా కొనుగోళ్లు జరిగేలా చర్యలు తీసుకుంటామని చెప్పారు. బీబీపేట మండలం మల్కాపూర్లో మూడు రోజులుగా కాంటాలు చేయడం లేదని రైతులు మండల కేంద్రానికి తరలివచ్చి రాస్తారోకో చేశారు. డీసీఎంఎస్ చైర్మన్ ఇంద్రసేనారె డ్డి వెళ్లి రైతులతో మాట్లాడారు. కాంటాలు చేయిస్తానని హామీనివ్వడంతో రైతులు ఆందోళన
విరమించారు.
