రచయిత్రి, ద‌ర్శకురాలు లీనా మ‌ణిమేక‌లై వివాదంలో చిక్కుకున్నారు. మతపరమైన మనోభావాలను దెబ్బతీసినందుకు గాను ఆమె పై కేసు నమోదైంది. ఇంతకీ ఏం జరిగిందంటే.. మ‌ణిమేక‌లై రూపొందిస్తున్న డాక్యుమెంట‌రీ ఫిలిం ‘కాళీ’ . దీనికి సంబంధించిన పోస్టర్ ఇప్పుడు దుమారం రేపింది. ఈ పోస్టర్ లో కాళీమాత గెట‌ప్‌లో ఉన్న ఓ న‌టి ఒక చేత్తో త్రిశూలం ప‌ట్టుకుని మ‌రో చేత్తో సిగిరెట్ తాగుతున్నట్లుగా కనిపిస్తోంది. ఈ పోస్టర్ ను లీనా మ‌ణిమేక‌లై జూలై 2న సోషల్ మీడియాలో షేర్ చేయగా ఇది క్షణాల్లో వైరల్ గా మారింది.
దీనితో ఆమె పై నెటిజన్లు సోషల్ మీడియాలో తీవ్ర స్థాయిలో ఆగ్రహం వ్యక్తం చేస్తున్నారు. ట్విట్టర్లో #arrestleenamanimekalai అనే హ్యాష్ ట్యాగ్ ను ట్రెండ్ చేయడం కూడా ప్రారంభించారు. ఈ క్రమంలో మతపరమైన మనోభావాలను దెబ్బతీసినందుకు గాను ఉత్తరప్రదేశ్ పోలీసులు ఆమె పై ఎఫ్ఐఆర్ నమోదు చేశారు. ఐపీసీ సెక్షన్లు, 120-B, 153-B, 295, 295-A, 298, 504, 505(1)(b), 505(2), 66 , 67 ల కింద ఎఫ్ఐఆర్ నమోదు చేసినట్లుగా హజ్రత్‌గంజ్ పోలీసులు తెలిపారు.
అటు ఇంత రచ్చ జరుగుతున్నా మ‌ణిమేక‌లై మాత్రం వెనక్కి తగ్గడం లేదు. విమర్శించేవాళ్లు ముందుగా సినిమాని చూడాలని ఆమె అంటున్నారు. తాను బతికి ఉన్నంతవరకు నిర్భయంగా తన గళాన్ని వినిపిస్తానని చెబుతోంది.
