హైదరాబాద్లో ఒక్కరోజే రోడ్డు ప్రమాదాల్లో నలుగురు మృతి

ఇబ్రహీం పట్నం, వెలుగు: సిటీలో వేర్వేరు చోట్ల జరిగిన రోడ్డు ప్రమాదాల్లో నలుగురు మృతి చెందగా, పలువురు తీవ్రంగా గాయపడ్డారు. సాగర్ ​హైవేపై బైక్​ను కారు ఢీ కొనడంతో ఒకరు మృతి చెందగా, అతని భార్య, కూతురుకు తీవ్ర గాయాలయ్యాయి. నల్లగొండ జిల్లా మర్రిగూడ మండలం ఎరుగండ్లపల్లికి చెందిన మైలారపు జంగయ్య(36) తన భార్య పార్వతమ్మ, కూతురు అశ్వితతో కలిసి సోమవారం ఉదయం బైక్​పై హైదరాబాద్​కు బయలుదేరారు. 

మంచాల పరిధిలోని గురునానక్ కాలేజీ సమీపంలో వీరిని వెనుక నుంచి కారు ఢీకొట్టి చెట్ల పొదల్లోకి దూసుకెళ్లింది. ఈ ప్రమాదంలో జంగయ్య అక్కడికక్కడే మృతి చెందగా, అతని భార్య, కూతురు గాయపడినట్లు ఎస్ఐ లాలయ్య తెలిపారు.

మరో బైక్ను ఢీకొని సాఫ్ట్​వేర్ ఉద్యోగి..
గచ్చిబౌలి: ఐటీ కారిడార్​లో ముందు వెళ్తున్న బైక్​ను ఢీకొని సాఫ్ట్​వేర్​ఉద్యోగి మృతి చెందాడు. మహబూబాబాద్ జిల్లా కొర్వి మండలం పెద్దగూడ తండాకు చెందిన గుగులోత్ గోవింద్ (29) గచ్చిబౌలిలో ఐటీ ఉద్యోగం చేస్తూ టెలికాం నగర్ కాలనీలో ఉంటున్నాడు. ఆదివారం అర్ధరాత్రి గోవింద్ తన రాయల్ ఎన్ ఫీల్డ్ బైక్​మీద టెలికాం నగర్ నుంచి మాదాపూర్ వైపు బయలుదేరాడు. మార్గమధ్యలో శిల్పా లేఅవుట్ ఫ్లైఓవర్ కింద తన ముందు వెళ్తున్న హీరో ఫ్యాషన్ బైక్​ను అదుపుతప్పి ఢీకొట్టాడు. ఈ ప్రమాదంలో గోవింద్ తలకు తీవ్ర గాయం కావడంతో ఆస్పత్రిలో చికిత్స పొందుతూ మృతి చెందాడు. ఫ్యాషన్ వాహనం మీద వినోద్ తన భార్య జ్యోతితో కలిసి గౌలిదొడ్డి నుంచి కూకట్ పల్లికి వెళ్తున్నాడు. ఈ ప్రమాదంలో  వినోద్ కు సైతం తీవ్ర గాయాలు కాగా, వెనుక కూర్చున్న అతని భార్య ప్రమాదం నుంచి క్షేమంగా బయటపడింది.

భార్యను తీసుకురావడానికి వెళ్తూ.. 
హైదరాబాద్​సిటీ: పుట్టింటి వద్ద ఉన్న భార్యను తీసుకురావడానికి వెళ్తూ భర్త చనిపోయాడు. వికారాబాద్ జిల్లా పెద్దేముల్​మండలం బాయిమీది తండాకు చెందిన పవార్​ జైసింగ్​(22)కు పాషపూర్​తండాకు చెందిన అనితతో పెండ్లి జరిగింది. అయితే, పుట్టింట్లో గుడి పూజ ఉండడంతో గత నెల 27న అనిత అక్కడి వెళ్లింది. ఆమెను తీసుకురావడానికి ఆదివారం పాషపూర్​తండాకు జైసింగ్ బైక్​పై​బయలుదేరాడు. మార్గమధ్యలో అడికిచర్ల దాటిన తరువాత ఎదురుగా వస్తున్న గుర్తుతెలియని వాహనం ఢీకొని అక్కడికక్కడే చనిపోయాడు.

గండిపేట: గుర్తు తెలియని వాహనం ఢీకొనడంతో నార్సింగిలో ఒకరు చనిపోయారు. నార్సింగికి చెందిన శ్రీనివాస్‌‌‌‌ ఆదివారం రాత్రి వివేకానందనగర్‌‌‌‌ కాలనీలో రోడ్డుపై నడుచుకుంటూ వెళ్తున్నాడు. ఈ సమయంలో గుర్తు తెలియని వాహనం ఢీకొనడంతో శ్రీనివాస్ మృతి చెందాడు. పోలీసులు ఘటనాస్థలాన్ని పరిశీలించి డెడ్​బాడీని ఉస్మానియా ఆసుపత్రికి తరలించారు.

ఆటోను ఢీకొట్టిన లారీ
కీసర: ఆటోను లారీ ఢీకొనడంతో పలువురు మహిళలు తీవ్రంగా గాయపడ్డారు. కలెక్టర్ ఆఫీస్​లో సోమవారం మహిళా గ్రూప్ సమావేశం ఉండగా, కీసర నుంచి పలువురు మహిళలు ఆటోలో బయలుదేరారు. తిమ్మాయిపల్లి సమీపంలో వీరిని ఆటోను లారీ ఢీకొనడంతో అందులోని వారికి తీవ్ర గాయాలయ్యాయి. స్థానికుల సమాచారంతో వీరిని పోలీసులు సమీప ఆసుపత్రికి తరలించారు.